DILI, STLTIMORLESTE.com – Banku Nasional Komersiu Timor Leste, S.A. (BNCTL) hola parte nuudar patrosinador iha maratona Internasional Dili 2025.
Komisaun organizadora Maratona Internasional Dili 2025 ho orgulhu fo sai katak, Banku Nasional Komersiu Timor-Leste, S.A. (BNCTL) hola parte ona nuudar Patrosinador Nivel Prata.
Parseria signifikante ida nee hatudu kompromisu husi banku boot liu iha nasaun nee atu promove saude, bem-estar, no dezenvolvimentu komunitariu iha Timor-Leste laran tomak.
Tuir komunikadu neebe STL, asesu husi media Prezidensia Republika Tersa (07/10/2025) hatete, Nota entendimentu asina husi Xefe Kaza Sivil Prezidensia Republika, Jesuína Maria Ferreira Gomes, no Membru Komite Ezekutivu BNCTL, Joaquim dos Reis Martins. Patrosíniu sei apoia diretamente ba lojístika eventu nian, servisu partisipante sira nian, no programa sira divulgasaun komunidade nian neebe asosiadu ho maratona.
BNCTL nia nain tomak mak Estadu Timor-Leste nian no hamriik nuudar banku boot liu iha nasaun ida nee ho sukursal no unidade 29 iha munisípiu hotu, ATM 65 neebe ativu, no terminal POS neebe rejistu hamutuk 322, BNCTL atende maizumenus kliente 380,000 neebe reprezenta 73% husi kuota merkadu, no kliente sira nia depozitu kuaze USD 500,000 (dolar amerikanu rihun atus lima), ida-nee ida-nee refleta publiku nia konfiansa mai Banku ninia integridade no dezempeñu neebe konfiavel BNCTL kontinua dudu inkluzaun finanseira no transformasaun dijital iha Timor-Leste laran tomak.
Membru Komite Ezekutivu BNCTL, Joaquim dos Reis Martins, afirma “BNCTL sente onradu atu apoia Maratona Internasional Dili 2025 nuudar patrosinador Nivel Prata, eventu nee hatudu valor sira neebe ami kaer metin – unidade komunitaria, moris saudavel, no solidariedade internasional.
“Ami nia kontribuisaun reflete ami nia kompromisu ba inisiativa sira neebe halibur ita-nia povu hamutuk no hatudu Timor-Leste nia espíritu reziliensia no pas ba mundu. Ami sente orgulhu hodi apoia eventu ida neebe halo advokasia ba rezolusaun pasífika enkuantu selebra adezaun tomak Timor Leste nian iha ASEAN,” dehan Joaquim.
Maratona Internasional Dili 2025 ho tema “Halai ba Palestina,” ho patrosíniu husi Prezidente no Laureadu Nobel ba Pas, Jose Ramos-Horta, realiza ho kolaborasaun hamutuk ho IX Governu Konstitusional, Ministeriu Juventude, Desportu, Arte no Kultura, no Federasaun Atletizmu Timor Leste.
Eventu nee sei halao iha loron 11 fulan-Outubru tinan 2025, sei iha kategoria korrida oioin inklui maratona kompletu (42.195km), meia-maratona (21.098km), eventu para-atletizmu (10km), no halai divertidu 3km neebe apropriadu ba família no komunidade sira. Korrida hotu-hotu sei hahu no remata iha prestijiozu Palasiu Prezidensial Nicolau Lobato, simboliza unidade nasional no valor demokratiku sira.
Xefe Kaza Sivil Prezidensia Republika, Jesuína Gomes, haktuir Desportu iha kbiit atu halibur komunidade sira no promove valor pozitivu sira. Tema Halai ba Palestina rezoan ho ita-nia nasaun nia viajen rasik ba pas no independensia.
“Parseria ho BNCTL hametin ita-nia abilidade atu atu fornese esperiensia maratona klase mundial. Sira nia kontribuisaun, kombina ho sira nia rede extensiva iha Timor-Leste tomak, sei ajuda ita atu enkoraja partisipasaun liu-tan iha eventu istoriku ida nee,” Katak nia.
Harii iha tinan 2010 husi Prezidente no Laureadu Nobel ba Pas, J. Ramos Horta, Maratona Internasional Dili ho objetivu atu promove saude, bem-estar, no turizmu. Eventu nee halibur partisipante lokal no internasional sira iha selebrasaun ba desportu no reziliensia nian. Edisaun 2025, ho tema “Halai ba Palestina”, defende rezolusaun pasífika sira enkuantu selebra Timor-Leste nia adezaun ba ASEAN. Eventu nee hein atu atrai partisipante atus resin, hodi fo impulsu signifikativu ba turizmu lokal. Rejistu taka iha loron 8 fulan-Outubru tinan 2025.
Jornalista: Emerenciana Pinto
Editora:Carme Ximebes
