DILI, STLTIMORLESTE.com – Aniversariu Banku Nasional Komersiu Timor Leste (BNCTL – sigla português) ba dala 14, nunee Prezidente BNCTL, Januario da Gama husu ba jogador sira atu kontinua promove jogu ho onestidade, nakonu ho amizade no labele tau tarjetu nee ba iha premiu hodi lori interese ba estraga ambiente husi jogu nee.
Lia hira nee hatoo husi Prezidente BNCTL, Januario da Gama ba jornalista sira hafoin halo abertura jogu futsal aniversariu BNCTL ba dala 14, ho nia tema “BNCTL ba Ema Hotu” iha Bebora, Domingu nee (15/06/2025).
Objetivu husi jogu futsal nee laos atu halo kompetisaun, maibe atu hametin ita nia lasu amizade entre instituisaun ho instituisaun no lasu amizade entre individu ho individu ida.
“Ohin loraik nee BNCTL halibur ita hotu hamutuk iha nee hodi halo abertura ba jogu futsal iha ambitu selebrasaun loron BNCTL ba dala 14 , ita hotu hatene iha 2011 BNCTL estabelese banku mundial nia ezistensia hodi too mai iha tinan 2025 tama ona ba idade 14,” hatete Januario.
Januario tenik, husi selebrasaun aniversariu BNCTL, konsidera jogu futsal hanesan tradisaun no kultura ida neebe BNCTL halo animasaun ho komunidade no mos ba kolaboradores sira hotu.
“Aproveita jogu ida nee, tanba iha ambitu selebrasaun BNCTL nian atu hakbesik ba estasaun servisu finanseira no bankaria ba sosiedade no komunidade atu aproveita jogu futsal ida nee, BNCTL estabelese hodi atende kliente no komunidade sira diak liu tan,” ketak Januario.
Nunee, promove ita nia talentu liu husi jogu, tanba jogu nee laos premiu no hadia ida, maibe hanesan valor ida atu halo intensiva no motiva jogador sira.
Nia mos husu ba adeptus sira hotu, aleinde premiu neebe mak oferese sei partisipa iha kuiz, nunee foti rifa sei fornese mos premiu ho valor ida, husi valor ida ho motorizada too valor ida kiik oan.
“Ba klasifikasaun primeiru BNCTL sei oferese US$ 5 mil ba ekipa feto no mane, ba klasifikasaun segundu sei oferese US$ 3mil hanesam mos feto ho mane no klasifikasaun terseiru oferese US$ 2 mil ba feto no mane,” Januario fundamenta.
Iha fatin hanesan, Ministeriu Juventude Desportu Arte no Kultura (MJDAC), Nelio Isac Sarmentu hatoo agradese ba BNCTL no setor privadu sira hotu sei hamutuk hodi lori desportu ba oin.
“Ami agradese tebes ba inisiativa neebe ita halo, tanba wainhira ita haree dezenvolvimentu iha area desportu labele hein governu deit, maibe setor privadu sira neebe mak kontribui makaas atu nunee iha tempu ikus mai sei hetan atletas neebe mak diak hodi reprezentante estadu,” sublina Nelio.
Nia dehan, tempu too ona atu koopera hamutuk hodi halo investimentu neebe mak estratejiku hodi dudu joven sira neebe hakarak partisipa iha desportu nee para lori Timor Leste ba mundu desportu nia.
“Espera katak inisiativa ida neebe BNCTL halo sei bele enkoraja mos setor privadu sira seluk atu iha vontade liu tan hodi koopera ho ita nia estadu hodi halo eventu desportivu barak liu tan iha ita nian rai,” hakotu Nelio.
(EST 1)
