DILI, STLTIMORLESTE.com – Banku Nasional Komersiu Timor Leste (BNCTL – sigla português) ofisialmente lansa website BNCTL foun www.bnctl.tl, hodi responde ba ezijenia husi kliente sira durante nee.
“Lansamentu website foun ida nee koresponde atu responde ba nesesidade reklamasaun hirak neebe mak ami banku simu husi kliente sira hotu, tanba dala barak ita haree kliente sira hatoo mai banku katak, seidauk iha fasilidade dijital neebe mak bele fasilita kliente sira atu komunika ho banku,” dehan Prezidente Konselhu Administrasaun BNCTL, Lucia da Cruz Flor ba jornalista sira, hafoin remata lansamentu website BNCTL foun iha ambitu Night Market, iha Timor Plaza Aimutin, Sabadu (08/02/2025).
Nia hatutan, website nee atu fasilita kliente sira hakarak atu loke sira nia konta, website nee mos atu fasilita kliente sira antes atu ba banku tenke halo uluk kalkulasaun ba sira nia kreditu, sira nia depozitu ba prazu .
Nia sublina, ho revizaun website ida nee, saida mak banku sei fo ba kliente sira ninia benefisiu mak husi parometru neebe mak iha website nee, kliente sira bele hetan kalkulasaun, simulasaun ba kreditu nian, kliente sira bele kalkula ho ninia salariu, se nia salariu ho montante hanesan nee, bele foti kreditu US$ 5000, fulan-fulan selu hira, nia taxa hira too tinan hira mak selu kreditu nee too hotu.
Bainhira hakarak rai osan, kliente hakarak halo depozitu prazu (time depozite), bele halo simulasaun iha website refere.
Reforsa tan, se bainhira rai osan ho montante US$ 5000, fo ezemplu tinan ida nia laran, kada funan hetan nia funan hira, liu husi website nee bele fasilita, nunee mos iha tan informasaun hirak seluk kliente sira bele asesu iha website refere.
Nunee, website nee hanesan formulariu atu adere ba kreditu P24, atu loke konta, no bele mos hatoo informasaun ka pergunta ruma liu husi website mos bele, bele mos hatene endresu sukursal sira seluk fora husi Dili. Website nee nia diak atu fasilita kliente sira, bainhira ita karega iha website nee nia fo kedas GPS ninia route ba ita.
Lucia akresenta, website refere konserteza sei fasilita informasaun neebe mak disponivel. Banku ninia prinsipal servisu mak servi kliente sira ninia nesesidade, bainhira kliente sira hatoo sira nia reklamasaun no dezafiu saida deit mak kliente hasoru iha atividade loron-loron relasaun negosiu ho banku, sira nia dever no obrigasaun haree sira ninia nesesidade no buka forma atu servi diak liu tan kliente sira.
Iha fatin hanesan, Jerente IT no Dijitalizasaun iha BNCTL, Nomicio Sousa Gomes dehan, website nee hanesan dijital ba profile banku nian, iha neebe informasaun ofisiu banku nian kliente sira bele asesu iha neeba.
“Kontiudu kona-ba banku nee jere husi se, nia vizaun no misaun nia produtu, banku monta ona iha website refere. Tanba baibain kliente sira sempre husu atu asesu ba kreditu nee oinsa, rekezitus saida saida, fasil kliete sira asesu iha website www.bnctl.tl,” dehan nia.
Nia hatutan, website refere sei ajuda tebes kliente sira, duke gasta tempu ba banku konfirma informasaun, maibe fasil atu asesu informasaun banku nian liu husi website. No iha website nee banku fasilita lingua tolu mak hanesan tetum, portugues no Ingles.
(ter)
