DILI, STLTIMORLESTE.com – Loron ikus Cruz Joven Internasional no Icon Maria Salus Popoli Romani husik hela sarani Timor Leste hodi viajen ba Thailandia, sarani sira hamonu matan-been hodi hatete, boa viajen Cruz Joven Internasional no Icon Maria Salus Popoli Romani.
Cruz Joven Internasional no Icon Maria Salus Popoli Romani iha TL durante semana ida, hahu husi loron 23-30 Agostu 2025.
Sarani Tomas de Oliveira hatete, durante Cruz Joven Internasional no Icon Maria Salus Popoli Romani hamutuk sarani sira iha TL sente kontente, basa nia prezensa lori bensaun no domin ba rai Timor.
“Hau sente laran todan triste iha momentu loron ida nee, tanba Cruz Joven Internasional no Ilhas Nain Feto husik sarani TL,” hatete nia ba jornalista STL iha Aeroportu Internasional Nicolau Lobato, Comoro, Sabadu (30/08/2025).
Tanba nuudar fiar nain rai TL rai Maromak nian, nuudar Timor oan sai fuan ida ba nasaun isin lolon ida fuan hamutuk tomak, tanba iha 2024 TL vizita Sua Santidade Papa Francisco no tinan 2025 vizita Cruz Internasional no Icon Maria Salus Popoli Romani.
Ba joven sira liu husi vizita Cruz Joven Internasional no Icon Maria Salus Popoli Romani iha TL, oinsa hametin imi nia fiar sarani neebe diak ida iha rai ida nee, basa prezensa Cruz Joven no Ilhas Nain Feto lori grasa ba Timor oan sira.
Sarani Tomas dehan, maske Cruz Joven Internasional no ilhas Nain Feto husik Timor ba iha Thailandia, maibe sei mai nafatin, tanba hanai no reza nafatin hodi vizita iha rai ida nee.
Tuir observasaun iha Igreja Katedral Dili, Cruz Joven Internasional no Icon Maria Salus Popoli Romani fila hikas ba Thailandia.
Antes lori Cruz Joven Internasional no Icon Maria Salus Popoli Romani ba Aeroportu Internasional Nicolau Lobato ho misa enseramentu hahu tuku 06.30 dader neebe prezide husi Sua Eminencia Dom Virgilio Cardeal do Carmo da Silva, SDB akompanha ho Amu sira, iha misa nee delegasaun Korea hananu muzika ida ba TL nomos fo prezente ba Sua Eminencia Dom Cardeal do Carmo da Silva, SDB.
Depois de misa ekipa Sinodal hamutuk sarani kontinua halo prosesaun husi Se Katedral Dili ba Aeroportu Internasional Nicolau Lobato hodi viajen ba Thailandia, tanba nee iha Aeroportu Internasional Nicolau Lobato atu entrega Cruz Joven Internasional no Icon Maria Salus Popoli Romani despedida kultura husi Parokia Maubisi no Hatuberliku kontinua Sua Eminencia Dom Virgilio Cardeal do Carmo da Silva, SDB no Padre Francisco Indra do Nascimento Tey Seran entrega Cruz Joven Internasional no Icon Maria Salus Popoli Romani ba Delegasaun Korea.
Jornalista: Joaninha Belo
Editora: Domingas Gomes
