DILI, STLTIMORLESTE.com – Manorin bolsa kandidatu 2024 hamutuk 187 sei prienxe termu aseitasaun molok ba tuir formasaun semana ida iha Rairobo Atabae, Munisipiu Bobonaro.
Liafuan nee haktuir husi Prezidente Juri ba rekrutamentu bolsa kandidatu profesores, atual Diretor Nasional Rekursu Umanu iha Ministeriu Edukasaun, João Amaral ba jornalista STL iha sala konferensia Ministeriu Edukasaun Vila Verde, Kinta (14/08/2025).
“Ita nian manorin 187 neebe ita rekruta iha 2024, ami sei fo sai xamada ba sira, atu nunee sira sei mai prienxe termu aseitasaun iha loron Segunda, 18 Agostu, iha INFORDEPE. Nee duni kuaze semana ida sira sei prienxe termu aseitasaun nee molok sira ba tuir formasaun iha Rairobo Atabae, Munisipiu Bobonaro. Depois de sira aseita hotu, ami sei fo sai fali katak, sira sei ba tuir formasaun intensivu iha Rairobo semana ida,” nia esplika.
Nia dehan, depois de sira tuir formasaun semana ida iha Rairobo, Ministeriu Edukasaun sei fo pose ba sira no koloka sira ba iha nivel ensinu baziku neebe mak sira aseita atu koloka ba, hodi hanorin iha eskola neebe sira aseita ona.
“Se ita koloka tan 187, pur volta 900 resin deit ona mak iha bolsa, neebe mak agora daudaun sei iha bolsa nian laran. Ba hirak neebe mak iha bolsa nee, ba tinan oin ita koloka tuir profesores neebe reforma ho volume boot iha Ministeriu Edukasaun,” katak nia.
(jac)
