DILI, STLTIMORLESTE.com – Bolsa kandidatu profesor iha Munisipiu Manatuto hela deit iha komunidade nia uma no balun aluga uma, tanba too agora seidauk iha rezidensia ba sira.
Liafuan nee haktuir husi Diretor Servisu Edukasaun Munisipiu Manatuto, Patricio da Cruz Quintao ba STL via-telefone, Tersa (30/09/2025).
Nia dehan, professor sira nee sei hela iha komunidade nian uma, tanba agora foin hatama iha planu Ministeriu hodi konstroi rezidensia ba sira, neebe sei foka liu ba iha area remotas.
“Ita nian profesores sira nian hela fatin nee, agora sira sei hela iha komunidade nian uma, tanba agora ita foin hatama iha planu ministeriu nian mos hau haree iha. Depois ita iha planu munisipal ninia mos ita hatama too konstroi rezidensia sira, maibe ita foka liu ba iha area remotas sira nee. Ita nian bolsa kandidatu profesor sira nee agora hela iha komunidade sira nian uma,” dehan nia.
Nia afirma, iha eskola ida mak Professor sira hela iha uma PNDS ninia, tanba uluk nee konstroi duni ba professor sira, maibe balun aluga uma deit. Agora dadus nain hira mak aluga uma, nee presiza halo konfirmasaun didiak. Ba sira nee aluga uma nee professor nain 4 ou 5 mak hamutuk aluga uma, laos nain ida deit.
Jornalista: Jacinta Sequeira
Editora: Domingas Gomes
