DILI, STLTIMORLESTE.com – Bolsa kandidatu profesores kestiona kona-ba sira nian hela fatin ba Ministériu Edukasaun (ME) liu husi servisu Edukasaun Munisipiu Bobonaro, tanba balun too agora sei hela hamutuk ho komunidade sira.
Lia hirak nee hatoo husi Diretor Servisu Edukasaun Munisipiu Bobonaro, Miguel Freitas ba STL liu husi telefone, Kuarta (03/12/2025).
“Agora sira aluga iha komunidade ninia, maibe ikus nee tanba iha momentu ba nee dehan ami hela provizoriu, maibe oras nee komunidade sira ezije sai. Iha fatin neebe mak atu halo mudansa ba hela fatin nee araska, tanba distansia nee dok. Depois komunidade ninia familia mos barak, ida mak mai hatoo katak, hela ho komunidade no kalan toba ho komunidade nia oan, ida nee mak defikuldade,” nia konfirma.
Miguel hatutan, BK professores koloka mai iha Bobonaro hahu husi primeiru etapa too quinta etapa ona, mai primeiru 81, segundu 73, terseiru 33 no tuir fali 60, ikus mai iha pre eskolar nian nee 33.
“Dadus aluga uma nee maka ami sei konfirma hela,maibe dadus nee mai kompletu. Balun mak fila tiha ona, ida nee mak halo konfuzaun ba ami. Ida nee sem konesementu mai iha Munisipiu, ida nee mak konfuzaun,” nia dehan.
Jornalista: Jacinta Sequeira
Editora: Domingas Gomes
