DILI, STLTIMORLESTE.com – Tribunal Judisial Primeira Instansia Dili (TJPID) julga arguidu ho inisial CML ba iha krime Burla Simples, hasoru lezadu inisial PdCM.
Iha sala julgametu laran, Juiz lee tiha akuzasaun neebe iha, arguidu deklara hili direitu nonok la koalia ba faktus neebe iha. Maibe arguidu prontu atu devolve fali lezadu nia osan, no arguidu rekonhese katak hahalok neebe mak nia halo nee la diak.
Lezadu PdCM deklara katak, arguidu tenke devolve fali nia osan kada fulan devolve US$ 150, no lakohi arguidu atu devolve osan kada fulan US$ 100, tanba lezadu lakon boot.
Rona tiha deklarasaun husi arguidu no lezadu, tama kedan ba iha faze alegasaun.
Iha alegasaun nee Ministeriu Publiku husu Tribunal atu kondena arguidu no tenke ser devolve osan se la selu arguidu tenke prosesu tanba lezadu ezije nia osan.
Enkuantu husi parte Defeza husu Tribunal atu aplika justisa lo-loos ba arguidu.
Hafoin rona tiha alegasaun, Tribunal deside muda ba loron 12 fulan Janeiru tinan 2026, ho oras 14:00, hodi rona desizaun ikus.
Tuir akuzasaun katak, iha fulan Outubru tinan 2022 haleu oras tuku 15h00, arguidu ba iha lezadu nia uma iha Taibesi, hatoo katak ita hakarak hola motor lelaun ga, kada motorizada ho nia folin US$ 200, iha motorizada 5 neebe iha tempu badak Ministeriu Defeza sei halo lelaun.
Nunee lezadu kontaktu nia kolega sira seluk hodi rekolha osan ho montante US$ 1.000 Amerikanu, no folin renovasaun ba dokumentus (balik Nama) US$ 10 kada motorizada ba motorizada 5 hamutuk osan US$ 50, total osan entrega ba arguidu hamutuk US$ 1.050.
Liu tiha fulan 2 komu la iha rezultadu, lezadu kontaktu ba arguidu nia hatan dehan hein lai oituan sei iha prosesu nia laran, depois mak kontaktu imi mai foti motorizada sira nee.
Katak tuir mai lezadu kontaktu hikas hodi konfirma, maibe arguidu sempre responde hanesan iha leten.
Hafoin hein kleur liu kuandu lezadu kontaktu, arguidu sempre hatan ho maneira neebe hanesan hodi hases aan husi nia responsabilidade hodi devolve osan refere.
Arguida halo ho forma livre, deliberada i konsientemente ho meius bosok hodi uza lezadus sira nia osan no provoka lezadu hodi kauza prejuizo patrimonial ho nia valor osan US$ 1.050, no arguidu hatene katak ho meius bosok hodi konvense ema seluk hodi entrega nia osan.
Arguidu hatene katak konduta nee bele hetan kastigu tuir lei.
Nunee konstitui arguidu CML hanesan autoria material ba krime Burla Simples (haat) 4 neebe previstu iha artigu 266 husi Kodigu Penal.
Audensia julgamentu nee prezide husi Juiz estajiariu nain ida, Ministeriu Publiku reprezenta Prokurador Domingos Barreto, arguidu hetan asistensia legal husi Defensor Publiku, Manuel Sarmento.
Jornalista: Terezinha De Deus
