BAUKAU, STLTIMORLESTE.com – Bee Timor Leste, Empreza Publiku (BTL,EP) nia kliente sira iha area Vila Nova, Aldeia Betulale, Suku Tirilolo, Postu Administrativu Baukau Vila, Munisipiu Baukau, halerik ba bee moos.
Kliente BTL, Bendita de Jesus Amaral hateten, politika Governu estabelese ona BTL no Diresaun Servisu Munisipal Agua no Saneamentu iha Munisipiu Baukau objetivu atu fasilita bee moos ba kada uma kain, maibe realidade too ohin loron komunidade barak inklui kliente BTL nian balu sosa bee moos, tanba kanu neebe BTL estabelese la oferese bee moos ba kliente sira.
“Ohin loron realidade komunidade barak sei hola bee inklui hau, laos katak kanu laiha kanalizasaun la too, kanu neebe antes nee too ona ita nia komunidade sira nia hela fatin, maibe bee nuunka mosu, ida nee nia impaktu saida volume bee mak la too ga manutensaun ba kanalizasaun mak seidauk masimu,” Bendita hateten ba jornalista sira, iha Vila Nova, Baukau, Kinta (20/11/2025).
Kliente nee komenta, bee moos nesesidade importante ba komunidade sira atu utiliza aliende ba komsumu no garante hijene moris, nunee komunidade barak rejistu ona naran iha BTL Baukau atu sai kliente BTL nian hodi asesu bee moos husi BTL, maibe kliente sira hela ho rejistu too ohin loron seidauk asesu bee moos husi kanalizasaun neebe BTL estabelese ba nia kliente sira.
Husi la asesu bee moos kliente sira obrigadu tenke sosa hikas fali bee moos husi transporte tangki privadu sira litru 5000 ho folin US$ 12 hafoin utiliza ba nesesidade diaria, tanba nee Bendita husu parte relevante liu liu BTL no Autoridade Munisipiu Baukau atu tau atensaun ba asuntu refere.
“Ami rekomenda hela ba parte relevante atu bele aselera identifikasaun asesu bee moos, tanba komunidade balu rejistu ona atu asesu bee moos maibe hein seidauk, prosesu nee mak naruk ga oinsa,” Bendita sujere.
Enkuantu Sekretaria Munisipal Asuntu Sosial, Maria Celestina Viegas mos preokupa asuntu refere, tanba nee nafatin halo koordenasaun ho BTL atu atende kliente sira nia nesesidade ba iha bee moos nian.
“Autoridade koordenador no orienta atu oinsa sira bele atende nesesidade komunidade sira liu liu kona-ba bee nian halo manutensaun ba kanu sira nee,” Maria katak.
Hatan ba kestaun nee, Koordenadora BTL,EP Munisipiu Baukau, Adriana Belo da Rosa rekoinhese, fornesementu bee moos husi BTL seidauk sufisiente ba kliente sira, tanba bee debitu kiik, maibe iha ona planu atu halo melhoramentu iha tinan 2026.
“Melhoramentu sistema kanu ita muda beibeik mos sei karik ita nia kaptasaun sira nafatin ita lao nunee, diak liu mak ita halo melhoramentu total para halo mudansa ba buat sira nee. Durante nee mos BTL troka kanu antigu sira maibe iha bairo balu seidauk tama too iha neeba maibe neineik ita halo too hotu, Xefe Suku Uailili mos entrega ona bee matan ita sei halo melhoramentu iha area urbana,” Adriana katak.
Koordenadora BTL, EP nee husu ba komunidade sira atu kontribui no oferese rai bainhira melhoramentu sistema bee moos lao, tanba bainhira komunidade sira la kontribui ba prosesu melhoramentu no konstrusaun tanki rezervatoriu atu ejize mos Estadu sei labele halo buat ida.
Jornalista: Tomas Reis
Editora: Carme Ximenes
