BAUKAU, STLTIMORLESTE.com – Bee Moos Timor Leste, Empreza Publiku (BTL,EP) sei kanaliza bee moos ba uma komunidade no fasilidade publiku sira iha Postu Administrativu Baukau Vila, Munisipiu Baukau.
Koordenadora BTL, EP Munisipiu Baukau, Adriana Belo da Rosa esplika, problema menus bee moos iha Postu Administrativu Venilale parte Vila nian, BTL kumpri ona nia dever liu husi levantamentu tekniku, preliminariu no daudaun too ona prosesu aprovisionamentu, no hein rezultadu publikasaun ba tenderizasaun kompanhia manan nain, atu implementa projetu kanaliza bee moos iha area Postu Venilale Vila.
“Ba iha Venilale Vila ita hein deit ona publikasaun rezultadu aprovisionamentu ba kompanhia manan nain, para bele ba implementa projetu nee iha neeba, bee matan neebe oras nee daudaun ita hili ona atu sai bee matan neebe ita, atu dada mak bee matan Uaisuli,” Adriana hateten ba STL, iha Vila Nova Baukau, Tersa (25/11/2025).
Nia sublina, bee matan Uaisuli identifikadu atu kanaliza ho distansia kilometru 10 neebe sei fo asesu ba komunidade uma kain hamutuk 100 kompostu husi Suku, Fatulia no Hatu-Haco inklui mos fo asesu ba edifisiu publiku sira hanesan eskola no sentru saude neebe eziste iha area Venilale Vila.
Nia komenta, kona-ba gastu orsamentu ba projetu kanalizasaun bee moos refere parte BTL, EP Munisipiu Baukau seidauk hetan nia totalidade, tanba prepara husi BTL,EP Nasional, maibe sei implementa iha tempu besik.
“Hau hanoin lais liu Dezembru mais Dezembru labele ba iha tinan oin, se karik laiha impedementu servisu hamutuk neebe diak BTL bele implementa lalais,” Adriana argumenta.
Koordenadora BTL,EP Munisipiu Baukau nee katak, BTL,EP bele implementa projetu kanalizasaun bee moos iha area Venilale Vila sedu, tanba preparasaun iha ona, maibe depende fila fali ba komunidade no Autoridade Suku, no Postu nia kolaborasaun ba iha implementasaun projetu refere.
Tanba nee husu komunidade, Autoridade Suku no Postu atu koopera ho implementasaun projetu refere, nunee bainhira konklui bele fo benefisiu ba komunidade sira iha area refere.
“Rekomendasaun liu liu mak nee, problema ita menus bee moos iha Venilale nee laos tempu badak nee tempu naruk ona, BTL nia esforsu mak too ona iha nee halo meius hotu hotu atu aumenta tan kaptasaun, para responde ba sira hotu nia nesesidade, saida mak ita presiza halo mak servisu hamutuk bainhira halo konstrusaun kanalizasaun labele halo impedementu,” Adriana sujere.
Hatan ba kestaun nee Xefe Suku Fatulia, Angelino Moisés Pereira hateten, implementa projetu refere, ba Autoridade Suku no komunidade Suku Fatulia prontu atu koopera, tanba bee moos importante ba nesesidade komunidade sira nian.
“Komunidade Fatulia infrenta hela bee moos, tanba nee Fatulia rasik sai benefisiariu ba bee moos ida nee, tanba bee ida nee iha kedas lokasi Fatulia nian, neebe nuudar Autoridade ami asegura no projetu nee bainhira implementa ami nafatin kontrola para termina ho diak,” Angelino promete.
Nia komenta, antes nee mos autoridade Suku koordena ona sidadaun nain ba bee matan refere no prontu, oferese bee matan refere atu BTL,EP kanaliza, tanba nee husu atu aselera implementa projetu refere hodi kore komunidade Fatulia husi problema bee moos inklui komunidade sira hela iha area Venilale Vila neebe oras nee halerik hela ba bee moos.
Entretantu bee matan Uaisuli neebe BTL,EP planeia atu kanaliza ba komunidade sira, iha area Postu Venilale Vila eziste iha Aldeia Bahadato, Suku Fatulia.
Jornalista: Tomas Reis
Editora: Carme Ximenes
