BAUKAU, STLTIMORLESTE.com – Prezidente Autoridade Munisipiu Baukau Veneranda Lemos hateten, Bee Timor Leste, Empreza Publiku (BTL,EP) seidauk dezenvolve perfurasaun bee moos iha Aldeia Kaisidu, Suku Tirillolo, Postu Administrativu Baukau Vila neebe entrega husi FALINTIL-Forsa Defeza Timor Leste (F-FDTL).
“Hau foti kestaun ida ke tinan kotuk hamutuk ho Major Jeneral Trix halo tiha ona lansamentu ba baku bee ida iha Kaisidu, F-FDTL nia esforsu baku hotu tiha bee, entrega tiha ba BTL too agora laiha andamentu,” hateten Veneranda Lemos ba jornalista STL iha Vila Nova, Kinta nee (08/05/2025).
Perfurasaun bee iha Kaisidu tuir provas STL iha, apoiu husi Governu Australia no halo perfurasaun liu husi kompanhia HO², realiza iha fulan Maiu tinan 2022 ho distansia perfurasaun metru 81, neebe bee nia aas metru 57,31 ho volume bee fo sai litru lima kada segundu (por second) nee iha kualidade diak ba konsumu.
Perfurasaun nee rasik implementasaun husi programa Militar Forsa Australia hamutuk ho FALINTIL – Forsa Defeza Timor Leste (F-FDTL) Komponente Forsa Terrestre (CFT – sigla português) Lanud Baukau neebe faze identifika, perfurasaun iha fulan Maiu 2022 no ikus halo instalasaun, maibe instalasaun laos husi kompanhia perfurasaun mak responsabiliza, tanba planu entrega ba entidade seluk hodi jere.
Nunee iha tinan liu ba José da Costa Soares “Trix” nuudar Komadante CFT Lanud Baukau hamutuk ho Prezidente Autoridade Munisipiu Baukau, Veneranda Lemos ofisialmente entrega ona perfurasaun refere ba BTL,EP atu kanaliza ba komunidade sira, maibe too ohin loron seidauk iha progresu fiziku, tanba BTL, EP rasik seidauk hahu servisu.
“Hau sei husu BTL para pronunsia kona-ba bee nee, tanba komunidade seidauk hetan bee, BTL tenke responde ba ida nee,” katak Venerada Lemos.
Enkuantu Xefe Suku Tirilolo, Elvino Freitas Belo akresenta, perfurasaun refere iha area Bainolale Aldeia Parlamentu, Suku Tirilolo, neebe iha tinan kotuk parte F-FDTL hamutuk ho Autoridade Munisipiu Baukau entrega ona ba BTL,EP atu kanaliza ba komunidade sira, maibe seidauk iha rezultadu, tanba BTL,EP rasik seidauk halo kanalizasaun.
“Perfurasaun nee F-FDTL mak entrega, iha neeba kedas ita nia komadante dehan, bele kanalizasaun ona ba ita nia komunidade, mais realidade too agora seidauk kanaliza,” hateten Elvino Freitas Belo.
Xefe Suku Tirilolo nee relata, perfurasaun neebe entrega ba BTL,EP atu kanaliza ba komunidade sira iha Aldeia Lialai-Lesu, Kaisidu, Parlamentu no Ossoua, mezmu asesu bee moos neebe kanaliza husi World Vision Timor-Leste nian husi bee matan Triloka, maibe debitu natoon, tanba fo asesu ba komunidade uma kain barak inklui Suku Kaibada sorin.
Nunee projete perfurasaun refere entrega ba BTL,EP atu kanaliza hodi aumenta fornesimentu bee moos ba komunidade sira, maibe BTL rasik laiha komitmentu atende nesesidade komunidade liu-liu bee moos.
“Hau husu sira tanba sa seidauk book too agora, nee preokupasaun ba komunidade sira, tanba bee neebe agora iha sira asesu debit bee menus,” Elvino Freitas Belo preokupa.
Liga asuntu nee, STL tenta konfirma Koordenadora Bee Timor Leste, Empreza Publiku Baukau, Adriana Belo da Roza iha knaar fatin, maibe pesoal seguransa katak, Koordenadora BTL,EP Baukau halao hela servisu iha fatin balun.
(tom)
