DILI, STLTIMORLESTE.com – Polisia Nasional Timor Leste (PNTL) liu husi Dirasaun Investigasaun Kriminal ezekuta ona mandatu buska no aprensaun dokumentu iha koridor Universidade Nasional Timor Lorosae (UNTL) no sira nia rezidensia iha loron Kuarta (06/08/2025), rezulta ema nain neen (6) sai arguidu.
Portavoz Seguransa Ministeriu Interior, Superintendente Polisia,Joao Belo dos Reis hato’o kestaun nee liu husi konferensia imprensa neebe halao iha Edifisiu Ministeriu Interior, Kaikoli, Dili, Kinta (07/08/2025).
Portavoz Joao Belo hatete iha buska no aprensaun nee Polisia Dirasaun Investigasaun Kriminal konsege koleta sasan neebe sira buka no mos buska no aprensaun ba arguidu nain neen iha UNTL no buska no aprensaun mos halo iha arguidu sira nia residensia.
“Ami halo ona buska no aprensaun iha koridor UNTL no arguidu sira nia residensia konsege koleta dokumentu sira neebe ami buka. Ami iha tempo 72 oras nia laran halo prosesu ba kazu nee atu aprezenta ba Ministeriu Publiku,” dehan Portavoz Joao Belo.
Nia dehan, iha tempo 72 oras sira halo hela prosesu ba arguidu sira atu aprezenta ba Ministeriu Publiku, tanba iha mandatu neebe sira ezekuta halo deit buska no aprensaun ka prende ba dokumentu relativa ba kazu nee, maibe la inklui investigasaun.
Relasiona ho kazu buska no aprensaun iha UNTL no ema nain 6 sai arguidu nee, Vise Dekanu ba Asuntu Peskiza no Kooperasaun iha UNTL, nuudar mos espesialista sosiolojia ba problema sosiais hatete katak tuir nia observasaun jeral ba sosiedade Timor Leste nee infrenta hela krizi kapital moral.
“Dala ruma individu balun simu kargu ruma aproveita akumula kapital finanseiru,” dehan nia.
Tuir nia krizi kapital moral nee laos deit akontese iha UNTL, maibe akontese kuaze instituisaun publikas hotu-hotu iha Timor nee no dala ruma balun boot liu ida nee, too agora seidauk detekta.
Tamba nee, alumni maestradu husi Brazil no doutoramentu husi Portugal nee husu ba instituisaun Komisaun Anti Korupsaun (KAK) no Polisia Investigasaun Kriminal atu habelar liutan sira nia knaar nee ba instituisaun publikas hotu-hotu, se lae estraga vida sosiedade Timor.
(mik)
