DILI, STLTIMORLESTE.com – Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) halo buska no aprensaun ba Reitor Universidade Nasional Timor Lorosa’e (UNTL), Joao Soares Martins ho estrutura sira.
“Horiseik (06/08) PNTL liu husi Diresaun Investigasaun Kriminal implementa mandadu buska no aprensaun neebe Tribunal Primeira Instansia Dili fo hodi halo buska no aprensaun ba parte UNTL,” hatete Portavos Komando PNTL, Superintendente Asistente Polisia, Joao Belo dos Reis ba jornalista sira iha edifisiu MI, Kinta (07/08/2025).
Diretor Diresaun Investigasaun Kriminal nee hatutan, husi buska no aprensaun nee konsege rekolha dokumentus importante sira husi arguidu nain 6 iha UNTL.
Nia informa, ekipa DIK prende mos dokumentus relatiu balu husi arguidu nain 6. Tanba tribunal fo ordem hodi halo buska no aprensaun iha koridor UNTL nomos arguidu sira nia rezidensia.
“Entaun husi buska no aprensaun nee ami konsege dezenvolve ami nia investigasaun, ami koleita sasan sira neebe ami buka. Buska no aprensaun nee mos ba arguidu nain 6 iha diresaun UNTL nian,” nia deklara.
Nia informa, ligadu ba buska no aprensaun nee ninian prosesu investigasaun lao hela, nunee too oras 72 sei aprezenta ba iha Ministeriu Publiku.
“Investigasaun lao hela, ami iha tempu oras 72 nia laran atu aprezenta prosesu nee ba iha Ministeriu Publiku. Ami ezekuta deit mandadu husi Tribunal hodi halo buska no aprensaun la detensaun. Ami sei submete deit mandadu neebe fo ba ami,” nia afirma.
(jen)
