DILI, STLTIMORLESTE.com – Prezidente Republika (PR), Jose Ramos Horta hatete, Centro Audiovisual Max Stahl Timor Leste (CAMSTL) sai obra inspirasaun no dedikasaun husi saudozu Max Stahl.
Prezidente Republika Jose Ramos Horta hatoo kestaun nee ba jornalista sira, bainhira abertura ba serimonia Galeria Max Stahl ou biblioteka Audiovisual CAMSTL iha salaun Benfica, Sesta (10/10/2025) hatete, kondisaun Centro Audiovisual Max Stahl Timor Leste (CAMSTL) merese rekonesimentu admirasaun husi ema hotu nia.
Atu halo manutensaun no aktualizasaun ho kondisaun neebe mak la diak, kondisaun infraestrutura aat los osan mos nunka sufisiente nee merese ita nia rekonesimentu, nee duni hau agradese ba sira nia sakrifisiu no sira nia dedikasaun,” dehan PR Horta.
Prezidente Republika hatete, Max Stahl ema ida neebe iha istoria iha mundu, iha balun neebe halo kontribuisaun rejistu luta istoriku oin-oin iha mundu nee, maibe ida nee kompletu tebes, uluk nia moris liu tiha mai indepedensia serimonia oin-oin iha TL, Max Stahl sempre partisipa liu husi halo filmajen husi kamera liu husi dokumentasaun husi kontrusaun estadu ho pasensia komitmentu.
CAMSTL sai obra inspirasaun no dedikasaun husi Saudozu Max Stahl nia mensajen sai inspirasaun ba jovens no jornalista sira kona-ba filmajen dokumentasaun Max Stahl nia obra, hau nia parabens ba imi hotu neebe loyal no servisu iha CAMSTL ho difikuldade oin-oin,” dehan Prezidente Republika.
Xefe Estadu hatete, centro nee sai Centro Nasional laos deit onra memoria Saudozu Max Stahl maibe arkivu sira neebe relembra nuudar istoria Timor Leste nia pasadu neebe nakonu ho sofrimentu oin-oin. Tanba Saudozu Max Stahl nia klamar no nia eransa sai ezemplu no korajen ho domin ba povu Timor hela ho Saudozu Max Stahl fo inspirasaun ba Timoroan hotu-hotu, tanba Saudozu nia partisipasaun iha TL nia luta hodi harii Estadu Demokratika ida nee.
PR Horta dehan, Saudozu Max Stahl husik rikusoin boot tebe-tebes, labele sosa ho osan, tanba nee CAMSTL kaer metin no hadomi Max Stahl tanba nee hanesan lisaun boot ida ba jerasaun hotu-hotu para hanoin beibeik istoria luta ba kontrusaun estadu. Tanba dezde uluk kedas nia sempre koalia ba funsionariu CAMSTL neebe simu todan husi Saudozu Max Stahl nian hodi autorizasaun no kondisaun neebe la diak, osan mos nunka sufisiente nee merese ema hotu nia apoiu ba sira liu ba CAMSTL.
Nunee mos Diretor Ezekutivu Centro Audivizual Max Stahl Timor Leste, CAMSTL Edicito Pinto hatoo ba Prezidente Republika Jose Ramos Horta marka prezensa. Ida nee onra boot ida ba sira.
Lori CAMSTL nia naran no ita hotu neebe prezente iha nee, ami hatoo ami nia parabens sinseru ba sua exelensia, tanba simu ona títulu doutoramentu honoris causa husi Universidade Minho, Portugal. Realizasaun nobre ida nee hanesan testamentu ida ba ita boot nia lideransa estraordinariu no kontribuisaun sira neebe klean ba nasaun ida nee no ba mundu,” dehan Diretor.
Nia hatete, ohin aniversariu Centro Audiovisual Max Stahl Timor-Leste nian ba dala 22. Aumezmu nee mos ita selebra aniversariu sidade Dili ba 256 anos. CAMSTL nia aniversariu ba tinan 22, ami hakarak halo galeria ida neebe dedika ba saudozu Max Stahl hodi nafatin memorializa ninia servisu no dedikasaun nuudar jornalista no reporter funu nian, hodi fo lian ba lian laek sira. No kontribuisuan saudozu Max Stahl nian ba ita nia luta no ukun an nian.
Nia hatete, Galeria ho títulu iha memoria Max Stahl nian sei simu estudante sira no bainaka sira neebe hakarak aprende husi nia viajen moris nian. Ida nee fornese lisaun ida neebe signifikativu ba jerasaun sira no ba jornalista sira iha futuru.
Fulan ida nee ami sei halao atividade rua mak galeria iha memoria Max Stahl nian no biblioteka audiovizual. Ami sei aproveita teknolojia hodi fornese asesu ba istoria dijitalizadu sira, hodi fasilita peskizador, akademiku, estudante universitariu sira, no manorin sira seluk hodi asesu material sira neebe saudozu max stahl grava no prezerva. Saudozu Max Stahl mos dehan beibeik antes nia husik mundu, katak rekursu audiovizual sira bele tama kurríkulu edukasaun ho divulgasaun teknolojia ida neebe modernu.
Jornalista: Emerenciana Pinto
Editor: Xisto Mendonça
