DILI, STLTIMORLESTE.com – Care Internasional apoiu livru revista lafaek hamutuk 148 ba Pre Eskolar Sagrada Familia Vila Verde, hodi fasilita estudantes sira aprende literasia no numerasia iha uma.
Lia hirak nee hatoo husi Koordenador Pre Eskolar Sagrada Familia Vila Verde, Cornelio Antonio Soares ba STL iha nia knaar fatin Vila Verde, Kuarta (05/02/2025).
“Livru revista lafaek neebe mak Care fo mai ami hamutuk 148, nee ohin mak sira foin fo ba iha ano letivu 2025 ninia, ami la halo pedidu, sira mak fo deit ami. Agora daudaun ami fahe kedas ba ita nian estudante sira, livru revista lafaek neebe mak Care fo nee bele ajuda labarik sira iha literasia no numerasia, nomos ambiente, labarik sira konhese mos aifuan nomos halo atividades iha uma,” nia dehan.
Cornelio hatete, agradese ba Care neebe mak apoiu estudante sira aprende diak liu tan kona-ba literasia, numerasia iha uma, tanba livru neebe care fo nee sei fahe ba estudantes idak-idak lori ba uma lee.
Entretantu Liliana Nunes hanesan inan husi estudante hatete, revista lafaek nee fahe ona ba estudantes sira, oinsa labarik sira lori ba uma hodi estuda, nuudar inan aman uza revista ida nee bele haruka oan sira aprende saida mak iha revista laran nee.
(jac)
