DILI, STLTIMORLESTE.com – Kamara Komersiu no Industria Timor Leste (CCI-TL – sigla português) realiza enkontru alargadu ho Ministeriu Planeamentu no Investimentu Estratejiku (MPIE), hodi koalia kona-ba presu unitariu ba projetu sira no prosesu regras aprovizionamentu.
Iha enkontru alargadu CCI-TL ho MPIE ho tema “Ho Espiritu Foun No Kolaborasaun Diak Ita Bele Alkansa Infraestrutura Ho Kualidade No Rezilente”.
Ministru Planeamentu no Investimentu Estratejiku (MPIE), Gastao Francisco de Sousa hatete, enkontru ohin nee inisiativa husi CCI-TL, halao enkontru alargadu ho Ministeriu Planeamentu no Investimentu Estratejiku (MPIE) hodi diskute kona-ba asuntu rua, presu unitariu kona-ba projeitu sira nee no regras aprovizionamentu.
“Tanba nee hau mai hamutuk ho Diretor Ezekutivu ADN no Diretor Ezekutivu CNA hodi esplika ba setor privadu Timoroan sira kona-ba presu unitaria no prosesu aprovizionamentu no regras saida mak aplika para setor privadu bele prepara aan hodi kompete iha konkursu sira neebe tinan nee lao no tinan oin ba projetu sira,” hatete Ministru Planeamentu no Investimentu Estratejiku (MPIE), Gastao Francisco de Sousa ba jornalista sira iha Multiuzu GMN Bebora, Kinta nee (20/03/2025).
Governante nee fiar katak ho aprezentasaun husi CCI-TL ho ADN nee bele esklarese duvidas neebe setor privadu iha tenke koalia ba malu, tenke rona mos husi setor privadu, solusaun saida mak diak ba setor privadu.
Tanba programa IX Governu katak, setor privadu mak parseiru dezenvolvimentu Governu nian, tanba liu husi dialogu bele rona malu fo hanoin ba malu, se la rona sira tuir ita nia deit, lakohi rezolve problema neebe sira iha nafatin deit.
Tanba ho aprezentasaun nee, husi CCI-TL no MPIE oinsa bele eleva sira nia konhesimentu, setor privadu sira bele envolve iha dezenvolvimentu nasional.
Iha fatin hanesan, Prezidente CCI-TL, Jorge Manuel de Araujo Serano hatete, iha enkontru alargadu nee ita hili tema “Ho Espiritu Foun No Kolaborasaun Diak Ita Bele Alkansa Infraestrutura Ho Kualidade No Rezilente”, tanba nee maluk setor privadu sira komunika diak ho instituisaun estadu hotu, “ita lakohi deklarasaun aberta, lakohi iha konferensia imprensa ataka ida, ataka ida neeba, hatudu liman ba la hetan benefisiu buat ida, ema seluk aproveita nia frazilidade, dezentendimentu sira nee ema dominia ekonomia rai laran,” dehan nia.
Nia haktuir, IX Governu Konstitusional hanoin diak atu dezenvolve setor privadu liu husi setor privadu nasional, nunee imi haree programa IX Governu.
(joa)
