BAUKAU, STLTIMORLESTE.com – Provizoriu Konselhu Kombatentes Libertasaun Nasional (CCLN – sigla português) Munisipiu Baukau simu ona reklamasaun husi kombatentes dedikasaun eskluzivu 3a7 & 0-3 hamutuk 750.
Prezidente Konselhu Kombatentes Libertasaun Nasional Munisipiu Baukau, Bernardo “Bere-Du’u” Gusmão esplika, hafoin lista Kombatentes Libertasaun neebe taka sai iha loron 15 Janeiru tinan nee no iha loron 16 Konselhu Munisipal kontinua kedas halo distribuisaun fisa ba kombatentes sira halo reklamasaun.
“Reklamasaun neebe ita simu ona hamutuk 750, sira nee 0-3 no 3a7, tanba sira la aseita hakarak 8a14,” hateten Beredu’u ba STL iha Vila Antiga, Segunda (10/02/2025).
Nia sublina, lista kombatentes neebe taka sai iha Baukau, Kombatentes neebe hetan dedikasaun eskluzivu 3a7 hamutuk 4.401 no 0-3 5.991 neebe Konselhu Munisipal distribui ona fisa reklamasaun hamutuk 4.186, maibe kombatentes neebe halo ona reklamasaun hamutuk 750 no restu seidauk tanba distansia.
Maibe Konselhu Kombatentes Libertasaun Nasional Munisipiu Baukau kontinua simu reklamasaun husi kombatentes sira, nunee bele relata ba nasional hodi hadia, tanba reklamasaun neebe daudaun iha Konselhu Kombatentes Munisipal, Kombatentes hotu-hotu neebe naran taka sai iha loron 15 Janeiru tinan nee, hetan dedikasaun eskluzivu 3a7 no 0-3, hakarak hetan dedikasaun eskluzivu 8a14.
“Loron mak la sufisiente, bele auguenta tan too 90 dias nee bele, maibe 60 dias labele, tanba barak mak seidauk hatama,” Beredu’u hateten.
Beredu’u agrumenta, kombatentes neebe la satisfas ho dedikasaun eskluzivu 3a7 no 0-3 hakarak sae ba 8a14, nee depende Ministeriu mak deside, maibe deside iha Konselhu Kombatentes Munisipal, balu deit no balu lae, tanba tenke bazeia ba servisu.
Maibe Beredu’u nafatin enkoraja kombatentes hotu atu halo reklamasaun, tanba loron neebe kombatentes sira atu halo reklamasaun sei remata iha loron 10 Marsu tinan nee no too loron 15 Marsu aprezenta ba Nasional hodi fo solusaun.
Entretantu Kombatentes neebe naran taka sai iha lista edital 2025 iha Munisipiu Baukau, dedikasaun eskluzivu ho 24 anos, 15a19 no 8a14 hamutuk 319, 3a7 4.401 enkuantu 0a3 rejistu hamutuk 5.991.
(EST 2)
