BAUKAU, STLTIMORLESTE.com – Konselhu Kombatentes Libertasaun Nasional (CCLN – sigla português) Munisipiu Baukau submete ona dadus kombatentes neebe halo reklamasaun ba nasional hamutuk 1.500.
Prezidente CCLN Munisipiu Baukau, Fernando “Beredu’u” Gusmão hatete, hafoin Ministeriu Asuntu Kombatentes Libertasaun Nasional publika lista edital kombatentes neebe rejistu iha tinan 2009 no orienta kombatentes neebe la satisfas ho dedikasaun eskluzivu 3a7 no 0a3, kombatentes sira iha Baukau hahu halo reklamasaun husi inisiu too ohin loron hamutuk nain 3.410, neebe faze primeiru sumbete ona ba nasional.
“Hodi bainhira primeiru hatama nee iha dia 14 Fevereiru hamutuk 1.500 no agora sei iha nee mak hamutuk 1.910,” hatete Beredu’u ba STL iha Vila Antiga, Tersa (25/02/2025).
Beredu’u sublina, husi numeru reklamasaun 1.500 refere, parte Konselhu Kombatentes Libertasaun Nasional Munisipiu Baukau submete ba nasional iha loron 14 Fevereiru nee ba faze primeiru, no kontinua simu tan kombatentes neebe halo reklamasaun ba faze segunda hamutuk nain 1.910.
Prezidente CCLN Baukau nee fundamenta, daudaun kontinua simu kombatentes neebe halo reklamasaun, nunee husu kombatentes sira hakbesik aan iha Sede Konselhu Kombatentes Munisipal foti formulariu hodi reklama, bainhira la satisfas ho grau neebe atribui uluk iha lista edital.
No lista kombatentes neebe halo reklamasaun, Konselhu Kombatentes Munisipal sei simu too deit iha loron 15 Marsu tinan nee hodi entrega ba Ministeiru, tanba nee kombatentes neebe la halo reklamasaun, Konselhu Kombatentes Munisipal sei la simu iha loron tuir mai.
(EST 1)
