DILI, STLTIMORLESTE.com – Konfederasaun Desportu Timor-Leste (CDTL – sigla português) atribui sertifikadu ba eis atleta Timoroan nain 54, neebe durante nee fo kontribuisaun medalha osan mean, mutin no metan ba Estadu Timor Leste (TL).
“Ita atribui sertifikadu nee ba eis atleta sira neebe kontribui medalha osan mean, mutin no metan ba Estadu TL, husi SEA GAMES iha tinan 2009 too 2019, entaun husi sira nian esforsu ida nee mak ohin hetan sertifikadu,” dehan Prezidente CDTL, Macário Sanches ba jornalista sira iha CNE Kaikoli, Dili, Sesta (06/12/2024).
Atribuisaun nee tuir nia hanesan meiu ida atu orienta ba atleta foun sira oinsa bele enkoraja nafatin, treinu ho diak, atu kapasita setor desportu nian ba mundu, liu-liu atu hetan valor ida hanesan medalha sira.
Tanba husi atividade sira neebe atleta sira halo, liu-liu Boxin, Taekwondo, Kempo no area desportu sira neebe uluk konsege hetan medalha, ohin hetan sertifikadu husi CDTL, nee hatudu katak, nuudar referensia importante ida durante sira kontribui ba nasaun Timor Leste.
Iha sorin seluk, Eis Atleta Jose Alves Caetano agradese ba sertifikadu neebe ohin atribui, liu-liu ba eis atleta sira, nee hanesan planu ida atu rekonhese ba atleta sira neebe hahu iha tinan 2009 too 2029 konsege hetan medalha hodi kontribui ba estadu.
Tanba atleta sira nia luta, hodi kontinua promove Estadu Timor Leste iha mundu atu haree, no kontinua dezenvolve area desportu nian iha nasaun bilateral sira, tanba nee husi sertifikadu nee nuudar ezemplu ida ba ema hotu.
Entretantu Atleta husi Sorinjo Kempo, Domingos Savio agradese ba Governu liu husi CDTL, bele rekonhese luta hirak neebe durante nee kontribui ba Estadu Timor Leste, liu-liu atividade desportu nian.
(EST 1)
