DILI, STLTIMORLESTE.com – Funsionaria Teknika Sekretaria Estadu no Igualidade (SEI) husi Departamentu Prevensaun no Kombate Violensia Bazeia ba Jeneru, Cecilia Vieira Cabral hetan nomeisaun partisipa formasaun kona-ba halakon violensia seksual no violensia bazeia ba jeneru (SGBV – sigla Inglés) durante semana tolu liu (23 Setembru-12 Outubru 2024) iha JICA Center, Tokyo, Japaun.
Tuir Komunikadu neebe mak STL asesu husi media SEI Kuarta nee (23/10/2024) hatete, objetivu husi formasaun ida nee mak atu hasae intervensaun sira atu rezolve Violensia Seksual no violensia bazeia ba jeneru no promove efetivamente ba prevensaun, protesaun, reabilitasaun no reintegrasaun sosial ba sobrevivente SGBV sira no prosesu no reabilitasaun ba perpetrador (ema sala na’n sira) liu husi aprendizajen ba malu ho partisipante sira seluk.
Formasaun ida nee mos atu haforsa advokasia no lina koordenasaun servisu tuir knaar no responsabilidade hodi halo prevensaun ba violensia seksual no violensia bazeia ba jeneru hodi responde no atendimentu adekuadu ba vítima no halo reabilitasaun ba Perpetrador iha servisu loron-loron.
Durante semana tolu liu, partisipante husi Timor Leste aprende ona lisaun sira liu husi aprezentasaun relatoriu nasaun idak-idak nian (country Report) konaba situasaun, atendimentu, mekanizmu referal, lei no konvensaun sira neebe ratifika ona husi nasaun sira seluk maibe iha nia implementasaun hasoru difikuldade iha orsamentu, rekursu umanu, sistema la hanesan, estabilidade polítika diak laiha hodi fo impaktu ba feto no labarik-feto minoridade no grupu vulneravel sira seluk nafatin moris iha diskriminasaun, intimidasaun, presaun psikolojia nia laran no mos sai alvu ba interese grupu balun nian, feto sira sai vítima no hasoru tipu violensia oioin iha sira nia moris mak hanesan abuzu seksual, asaltu seksual, violensia domestika, asediu seksual, raptu no seluk-seluk tan.
Violensia nee sai isu global no presiza iha polítika diak, komitmentu no envolve entidade hotu-hotu liu husi sosializasaun, desiminasaun no kampanhaa, mensajen pozitivu no edukasaun sívika tantu formal no naun-formal hodi muda ema-nia konsiensia no atitude hodi prevene violensia molok akontese.
Aleinde materia formasaun neebe hetan iha formasaun, hamutuk ho partisipante sira seluk mos hetan oportunidade diak hodi halao vizita ba iha Gabinete Igualdade Jeneru ba esforsu gabinete nian hodi luta hasoru violensia domestika no asaltu seksual, vizita Tokyo Metropolitan Women’s, Consultation and Support Center, Hyogo Prefectural Gender Equality Promotion Center, Disaster Reduction and Human Renovation Institution, Regional Center for Sexual Assault and Abuse Victim Hyogo, Vizita Rokko Women’s House, servisu hamutuk ho feto, inan no labarik mesak sira neebe hasoru difikuldade liu husi atividade uma mahon WACCA no vizita Organization For pornography and sexual Exploitation survivors (PAPS) hodi hatene atividade ba esforsu no servisu hamutuk ho parte seguransa fahe informasaun hodi responde ba esploitasaun seksual online neebe uza rejistu uza ema seluk nia naran no halo advokasia ba publiku sira nia konsiensia.
Formasaun nee partisipa husi nasaun sanulu resin haat kompostu husi feto sanulu resin rua (12) no Mane nain rua (2) mak hanesan Timor-Leste, Sudaun do Sul, Papua Nova Guinea, Pakistaun, Bangladesh, Botswana, Mongolia, Republika Demokratiku Kongo, Illa Solomon, Sri Langka, Kenya, Maldives, Ethiopia no Nepal neebe fasilita husi ekipa JICA no perita sira husi área igualdade, prevensaun VBJ no empoderamentu ekonomia ba feto.
Kustu ba Funsionaria SEI hodi partisipa iha formasaun refere mai husi OGE-SEI tinan 2024 no iha kolaborasaun ho JICA Timor Leste.
Iha biban nee Prezidente Konselhu Diretoria Rede Feto Timor Leste, Zelia Fernandes hatete, ema neebe mak hetan violasaun seksual tenke hatoo keixa labele nonok deit.
“Ema neebe mak hetan violasaun seksual tenke barani buka asistensia denunsia, katak hau hetan asedu seksual ita labele nonok deit tanba ita laos mesak, ida nee mak ami nia observasaun informasaun la sai oinsa mak ita fo asistensia, nia hetan tiha nonok deit ita labele fo asistensia,” katak nia.
(eme)
