DILI, STLTIMORLESTE.com – Prezidente Konferensia Episkopal Timorense (CET) ho Prezidente Republika Jose Ramos Horta deskuti kona-ba Transladasaun restu Dom Martinho Lopes husi Portugal mai Timor Leste.
Prezidente Konferensia Episkopal Timorense (CET), Dom Virgilio Cardeal do Carmo da Silva, SDB akompanha husi Bispu Dioseze Baukau, Dom Leandro Maria Alves, ho Bispu Dioseze Maliana, Dom Norberto do Amaral hasoru malu ho Prezidente Republika, Jose Ramos Horta hodi deskuti prosesu transladasaun Dom Martinho Lopes nia restu mortais husi Lisboa, nomos bispu nain rua hanesan Dom Jaime Goulard, ho Bispu Dom Joaquim Ribeiro neebe sei hakoi iha Portugal.
Bainhira remata halao enkontru, Prezidente CET Dom Virgilio Cardeal do Carmo da Silva, SDB ba jornalista sira iha Palasiu Prezidensial Nicolau Lobato Bairo Pite, Tersa (16/12/2025) hatete, ohin mai tanba responde ba karta Prezidente Republika nian kona-ba prosesu transladasaun restu mortais Dom Martinho Lopes nian husi Portugal mai Timor Leste.
“Ohin Konferensia Episkopal mai iha nee hanesan ami hatan karta ida husi Prezidente Republika, Jose Ramos Horta hakerek ba iha konferensia episkopal koalia kona-ba posibilidade atu halo transladasaun ba Munsenhor Martinho Lopes ninia restu mortais husi Lisboa mai iha Timor Leste. Asuntu ida nee mak ami mai koalia ho Prezidente Repiblika kona-ba asuntu ida nee,” dehan Dom Virgilio.
Dom Virgilio dehan mai koalia ho Prezidente Republika atu fo hanoin mos katak, sira mos hanoin.halo transladasaun karik, laos deit ona Munsenhor Martinho Lopes ninia restu mortais, maibe atu lori mos Bispu Timor ninian resto mortais neebe oras nee sei hakoi hela iha Portugal.
“Por ezemplu, primeiru Bispu Timor ninian Dom Jaime, segundu Bispu Joaquim Ribeiro, entaun ida nee mak ami trata,” informa Prezidente Konferensia Episkopal Timorense (CET), Dom Virgilio Cardeal do Carmo da Silva, SDB.
Iha hasoru malu nee Prezidente Republika mos kontente, momentu diak ida atu bele haree hamutuk, tan nee ohin tau iha akordu atu haree. Maibe, agora prepara oinsa ba futuru hodi halo transladasaun restu mortais sira.
“Planu ba 2026, fulan seidauk bele tanba ida nee sei presiza halo aproximasaun, negosiasaun, prepara buat sira nee hotu mak foin realiza, ita nia esperansa tarde liu Outubru hanesan nee se bele realiza ona, sedu liu diak liu, ida nee mak ohin mos koalia, ita nia hakarak sedu liu. Maibe ita mos hanoin bainhira tempu udan buat sira nee hotu atu bele halibur ema,” katak Dom Virgilio.
Entretantu, iha enkontru nee Prezidente Republika, Jose Ramos Horta sei fo apoiu tomak liu-liu kona-ba koordendasaun nasaun iha Lisboa, sei servisu hamutuk ho konferensia episkopal Timor ninian nunee bele buka realiza eventu ida nee ba tinan oin.
Jornalista: Emerenciana Pinto
Editor: Xisto Mendonça
