BAUKAU, STLTIMORLESTE.com – Fundasaun Sentru Feto Haburas Dezenvolvimentu (CFHD) Baukau atribui sertifikadu lingua ingles level I ba formadu hamutuk nain 45, iha Suku Kaibada, Postu Administrativu Baukau Vila, Munisipiu Baukau.
Diretora Sentru Formasaun, Tereza Perreira esplika, durasaun formasaun refere durante fulan 6, neebe inisiu husi fulan Maiu no remata iha Outumbru tinan 2024, neebe hetan partisipasaun husi sidadaun sira husi Suku Kaibada hamutuk 45 neebe kada fulan kontribui US$ 5.00 hodi fo salariu ba formador husi Sols nain 2 neebe durante hanorin.
“Kursu ida nee partisipa husi ema idade 6 ba laten, tanba ita hakarak kapasita ema la haree ba nia idade ho prosesu kedas husi Kiik oan sira, tanba ita haree lingua ida nee importante, se laiha lingua ema hotu labele asesu ba kampu de servisu,” hatete Tereza ba jornalista sira iha Uatulete, Kurta (13/11/2024).
Maibe nia dehan, mezmu durante formasaun materia neebe formador nain 2 fasilita ba formadu sira seidauk sufisiente, tanba foin aprende deit materia baziku level I nian, maibe sentru formasaun nafatin iha komitmentu atu hakat ba level II nian hodi fasilita liu tan formadu sira, maibe depende fali ba formadu sira.
Tereza mos konsidera, Lingua Ingles mak lingua internasional neebe presiza tebes sidadaun sira hatene, nunee bele kompleta iha kampu servisu rai liur no rai laran, inklui kompleta iha prosesu estudu sira.
Iha fatin hanesan, formada Geomarnesia da Silva Guterres sente kontente ho prezensa CFHD nian iha Suku Kaibada, hodi kapasita formadu sira ho lingua ingles.
“Hau agradese, tanba bele aproveita oportunidade ida nee tuir formasaun nee, tanba hau hatene Lingua Ingles, lian internasioanal,” tenik formada nee.
Enkuantu Xefe Suku Kaibada Cosme da Costa Lopes hatete, Suku Kaibada prontu simu parseiru servisu sira hanesan Organizasaun Naun Governamental sira nia prezensa iha Suku hodi apoiu sidadaun sira iha area formasaun oin-oin.
(EST 2)
