BAUKAU, STLTIMORLESTE.com – Fundasaun Sentru Feto Haburas Dezenvolvimentu (CFHD) kontinua fasilita grupu feto sira transforma produtu lokal sai produtu modernu.
Diretora Fundasaun CFHD, Tereza Perreira esplika, CFHD iha papel importante hodi luta ba feto sira iha baze partisipa iha prosesu dezenvolvimentu ba area negosiu nian, nunee inisiu tinan nee konsege kria grupu 2 iha Suku Kaibada, Postu Baukau, neebe involve feto nain 18 no mane 2 hodi transforma produtu lokal ba produtu modernu.
Nunee CFHD iha komitmentu halo kooperasaun ho indimu hodi fo kapasitasaun ba grupu 2 refere neebe estabelese ona atu transforma sukaer ba rebusadu, no tua metan musan ba kolan kalen hodi faan iha merkadu nivel munisipal.
“Dala barak ita haree produtu sira nee estraga deit, hanesan tali metan musan ema la utiliza nia tasak dodok too estraga deit nunee mos sukaer,” hateten Tereza ba jornalista sira bainhira realiza formasaun ba grupu feto iha Planaltu Baukau, Kuarta (16/10/2024).
Diretora nee konsidera, Baukau parte Suku Seisal, Tekinomata, inklui Postu Administrativu Vemasi balun iha sukaer barak, nunee mos tua metan fuan kuaze iha Baukau barak, maibe parte komunidade la konsege halo produsaun, tanba maioria seidauk iha konhesementu atu halo prosesamentu hodi transforma ba produtu hirak nee faan iha nivel merkadu.
Iha fatin hanesan, Xefe grupu Feto Uanioma, Olandina Carvalho De Sa sente kontente ba formasaun refere, tanba bele fo konesementu oinsa atu transforma produtu lokal ba produtu modernu.
Entretantu Xefe Suku Kaibada Cosme da Costa Lopes apresia ba kooperasaun CFHD neebe inisia ona kria grupu iha Suku Kaibada, involve komunidade sira atu halo produsaun ba rebusadu no kolan kalen hodi hakbiit rendimentu ekonomia familia.
“Atividade produsaun rebusadu nee laos buat foun, tanba hau haree iha fatin barak ema halo ona produsaun, maibe iha hau nia suku nee buat foun ba hau nia komunidade, tanba foin primeira vez aprende atu halo produsaun,” Cosme hateten.
Autoridade Suku Kaibada nee rekomenda ba parte kompetente atu tau matan no dezenvolve ba setor produsaun kiik sira, tanba maioria iha teritoriu laran hahu iha ona koinhesementu ba produsaun produtu klase kiik sira ho produtu lokal, maibe falta ekipamentus atu responde.
(EST 2)
