DILI, STLTIMORLESTE.com – Embaixadora Plan Internasional, Cidalia Moujinho Guterres hatete, feto atu ativu foti desizaun iha Partidu Politiku (Parpol) no fatin seluk, Sekretariu Estadu Igualdade (SEI) hamutuk ho parseiru nafatin halo sosializasaun no formasaun ba feto, nunee bele hasae konhesimentu hodi kompete.
Embaixadora Plan Internasional, Cidalia Moujinho Guterres hatoo kestaun nee liu husi nia diskursu iha Delta Nova Kuarta (28/05/2025) hatete, feto nia partisipasaun importante tebes iha eleisaun ida nee, no Timor Leste hanesan nasaun neebe demokrasia presiza partisipasaun husi parte ema hotu nia entre feto no mane inklui ema ho defisiensia.
“Durante nee ita akompanha feto sira partisipa iha nasional nomos iha munisipiu, no feto mos sei hasoru eleisaun neebe sei mosu iha tempu oin mai liu-liu eleisaun parlamentar, prezidensial nomos eleisaun ba desentralizasaun, tanba nee SEI hamutuk ho parseiru sira nafatin halao sosializasaun, formasaun ba ita nia grupu feto sira tantu sira neebe iha politika nomos ita nia maluk feto potensial sira atu nunee prepara sira partisipa iha eleisaun sira tuir mai,” katak Embaixadora Plan Internasional Timor Leste.
Embaixadora Plan Internasional dehan, feto Timor feto forte no iha vontade tomak, importante mak nafatin prepara aan, nunee tempu atu asumi kargu atu lidera ho responsabilidade.
“Simu no halao nee oin seluk ona, ita preokupa mak ita nia servisu nee oinsa mak sai diak no fo rezultadu ida nee mak importante,” katak Cidalia.
Nia mos husu nafatin feto sira prepara aan no feto Timor presiza unidade, nunee bainhira hetan oportunidade ruma laos ba aprende maibe ba atu halao servisu hodi fo rezultadu ba iha publiku.
Nunee mos Adjunta Gabinete Apoiu Sosiedade Civil (GASC), Yasinta Lujina husu feto sira hotu nafatin prepara aan ho kapasidade sira.
“Mensajen neebe hakarak rai hela hatoo ba hau nia inan feton sira, hau nia maluk feto sira, ita kontinua prepara ita nia aan ho ita nia kapasidade sira, ita uza oportunidade saida deit hodi bele dezenvolve ita nia kapasidade hodi bele hola parte iha prosesu sira neebe mak iha,” katak Ysinta.
Nia hatete, feto labele sai penontong maibe prepara aan sai autor importante iha dezenvolvimentu nasional ida nee.
Nunee mos Diretor Nasional Dezenvolvimentu Igualidade Jeneru husi SEI, Jose do Rosario de Carvalho hatete, SEI nafatin iha komitmentu atu suporta orsamentu ba ekipa Feto Prontu Lidera nomos iha komitmentu oinsa estabelese nia atividade sira fo formasaun ba lideransa partidu politiku sira no feto iha partidu politiku iha nasional no munisipiu sira para oinsa iha preparasaun aban bainrua iha atividade importante iha parte Governu feto ba ho kualidade.
“Husi SEI nafatin komitmentu atu halo programa formasaun no kapasitasaun sira liu husi partidu politiku sira para oinsa estabelese preparasaun aban bainrua ho kualidade,“ katak nia.
Diretor dehan, obstaklu ka bareira neebe feto sira hasoru iha moris mak kultura rasik, tanba husi kultuta ladun tau importansia ba feto katak feto nee labele ba ukun, maibe iha kultura balun nafatin fo suporta ba feto sira.
(eme)
