BAUKAU, STLTIMORLESTE.com – Konselhu Munisipal Kombatentes Libertasaun Nasional (CMCLN – sigla português) Baukau liu husi komisaun organizadora konvida ona veteranus nain 100, aban partisipa iha selebrasaun loron veteranus 03 Marsu 2026.
Sekretariu Jeral Konselhu Munisipal Kombatentes Libertasaun Nasional Baukau, Roberto Carlos da Costa “Laran Tarido” informa, seremonia ba selebrasaun loron veteranus neebe atu realiza iha loron 03 Marsu nee, estrutura CMCLN Baukau hamutuk ho Autoridade Munisipiu Baukau sei realiza seremonia Isar Bandeira neebe sei partisipa husi veteranus sira nomos Autoridade Sivil no Militares hamutuk nain 500, ho objetivu atu relembra Aswain sira nia sofrementu neebe tinan naruk infrenta iha ailaran.
“Importansia husi seremonia loron veteranus nee signifika konsentradu husi Forsa eis FALINTIL sira. Espesial ba veteranus sira atu hanoin fila fali durante moris defende rai ida nee,” Sekretariu Jeral Konselhu Munisipal Kombatentes Libertasaun Nasional Baukau, Roberto Carlos da Costa “Laran Tarido” ba STL iha nia knaar fatin, Segunda (02/03/2026).
Nia espresa, selebrasaun loron veteranus nian neebe akontese iha tinan liu ba ema barak seidauk sente ukun aan, maibe tinan nee ho espiritu veteranus sira nian bele dignifika no valoriza fila fali Aswain sira neebe lakon isin ba rai Timor.
Tanba nee husu ema hotu atu fo liman ba malu hodi atinji Aswain sira nia luta ba libertasaun nasional no dignifika veteranus no trara veteranus sira nia oan ba asesu edukasaun hodi kontinua liberta rai no povu.
Maibe rekoinhese durante tinan naruk 20 resin ona Timor ukun aan veteranus barak sei moris iha terus laran.
“Veteranu sira sakrifika sira aan durante tinan naruk nia laran, maibe barak la goza ba sira nia direitu, mutiladu la diak oinsa mak ita hanoin Estadu ga Governu ida nee valores ba sira para sira nia familia jerasaun hetan moris diak,” Roberto komenta.
Nia katak, veteranus hirak neebe daudaun seidauk asesu ba pensaun husi Estadu Timor Leste, Konselhu Munisipal nafatin esforsu hatoo preokupasaun sira nee ba Nasional atu solusiona, tanba husi sira nia esforsu ohin loron Timor sai nasaun ida.
Entretantu selebrasaun loron veteranus iha loron 03 Marsu tinan nee, CMCLN Baukau selebra ho total orsamentu US$ 4.500,00 kompostu husi alokasaun orsamentu husi Konselhu Kombatentes Libertasaun Nasional hamutuk US$ 2.500,00 no US$ 2.000 husi Autoridade Munisipiu Baukau neebe realiza ba atividade sira hanesan misa agradesimentu, kari aifunan iha jardim erois Fatumaka, semiteriu publiku Loidua, Ossouariu Laga no Lakuliu inklui vizita saudozu Vicente Reis ho nia espoza nia restus mortais iha Bukoli, vizita Komadante David Alex Dai Tula nia fatin iha Kaibada.
(tom)
