DILI, STLTIMORLESTE.com – Sentru Nasional Chega (CNC – sigla português) asina akordu ho Muzeum Memorial Munisipal tolu, hodi servisu parseria ba situs istoriku sira iha munisipiu.
“Ohin CNC asina akordu servisu hamutuk ho Muzeum Memorial Munisipal tolu mak hanesan Muzeum Memorial Munisipal Kovalima, Muzeum Memorial Munisipal Aileu no Muzeum Memorial Munisipal Bobonaro,” dehan Diretor Ezekutivu CNC, Hugo Maria Fernades ba jornalista sira iha salaun Gabinete CNC Balide, Dili, Sesta (21/03/2025).
Diretor nee hatete, hanesan baibain tinan-tinan CNC halo parseria ho Muzeum Memorial Munisipal sira.
“Hanesan baibain tinan-tinan CNC halo parseria ho Muzeum Memorial Munisipal sira, iha tinan ida nee hamutuk Muzeum Munisipal lima ona mak hamriik iha munisipiu, primeiru mak Munisipiu Kovalima, segundu Munisipiu Vikeke, terseiru Munisipiu Aileu, kuartu Munisipiu Bobonaro no ikus liu mak Munisipiu Manatutu, nee muzeum neebe hamriik ona iha munisipiu,” dehan nia.
Iha fatin hanesan, koordenadora Muzeum Memorial Munisipal Kovalima, Maria Carvalho Amaral hatete, CNC apoiu ida nee ba programa sira.
“Ami iha Muzeum Memorial Munisipal nee programa neebe espesifiku liu mak hanesan rekolha memoria ba ita nia veteranus sira ema rezistensia no sobrevivente, vitima sira neebe mak mai husi tinan 74 too mai iha tinan 99 nian,” dehan nia.
(EST 4)
