BAUKAU, STLTIMORLESTE.com – Sentru Nasional Chega (CNC – sigla português) konstrui uma ida ba sidadaun Ana Freitas iha Aldeia Uaimanuboe, Suku Uailili, Postu Administrativu Baukau Vila, Munisipiu Baukau.
Koordenador Ezekutivu Sekretariadu Nasional Asosiasaun Vitima Periodu 1974-1999, Domingos Pinto Araujo Moniz hateten, tuir istoria narativa data prosesu luta libertasaun nasional, sidadaun Ana Freitas merese hetan apoiu natoon hanesan uma dignu husi Estadu Timor Leste, tanba durante okupasaun Indonezia Ana Freitas vitima mos iha prosesu sira liu-liu obrigatoriu oferese dignidade ba militares Indonezia.
Maibe hafoin Timor ukun aan Ana Freitas moris ho kondisaun uma aat, tanba nee liu husi ekipa avaliador rekolha istoria badak no faktus hodi fo apoiu orsamentu hodi konstrui uma dignu ba Ana Freitas.
“Ohin ita halibur malu iha nee halo lansamentu ba uma memoria esperansa neebe ita nia benefisiaria Inan Ana Freitas ho medida 7X9 ho valor orsamentu rihun US$ 11,722.00,” Domingos hateten ba jornalista sira hafoin remata lansamentu promeira pedra ba konstrusaun uma benefisiaria Ana Freitas iha Uailili, Kinta (17/07/2025).
Nia esplika, orsamentu neebe preve sei konstrui uma medida luan metru 7, medida naruk metru 9, sei responde ba kuartu toba fatin tolu, sala vizita ida, haris fatin ida, varanda ida inklui konstrui dapur iha liur.
Nia sublina, uma medida refere sei kompleta ho asesoría sira hanesan taka kramik, plafond, instalasaun eletrisidade no odamanta janela kompletu responde ho valor orsamentu konstrusau US$ 11,722.00 la inklui orsamentu ba liman badaen.
“Ami nia tarjetu konstrusaun fulan tolu, ami nia haree iha nee buat hotu lao diak fulan rua resin hotu ona, tanba estrada tama kapas,” Katak Domingos.
Xefe Aldeia Uaimanuboe, Benvindo Xavier Gusmao konsidera, apoiu refere importante tebes ba benefisiaria Ana Freitas, tanba bele ajuda ona benefisiaria hodi hela iha uma dignu bainhira finaliza neebe sei konstrui husi Autoridade Aldeia Uaimanuboe rasik, tanba orsamentu ba liman badaen limitadu.
“Uma nee nia konstrusaun osan neebe selu ba badaen sira kiik liu, tanba ami kontaktu hotu badaen sira iha Uaimanuboe maibe la aseita hotu, entaun ami nuudar Autoridade, ami mak implementa rasik, tanba obras nee orgulhu boot ida ba Uaimanuboe,” hateten Benvindo.
Enkuantu benefisiariu Ana Freitas sente kontente, tanba bele hetan konstrusaun ba uma foun neebe Governu preve orsamentu liu husi CNC no aloka husi Sekretariadu Nasional Asosiasaun Vitima Periodu 1974-1999 no implementa husi Autoridade Aldeia Uaimanuboe, tanba orsamentu neebe aloka ba liman badaen rihun US$ 2.000 responde ba konstrusaun fiziku 100%.
(tom)
