DILI, STLTIMORLESTE.com – Parlamentu Nasional liu husi Bankada Kongresu Nasional Rekunstrusaun Timorense (CNRT) kestiona ka Kritika Dirijenti sira iha Hospital Nasional Guido Valadares (HNGV), neebe loke Fashion show iha areadores HNGV.
“Hau la konkorda no kritika desizaun neebe HNGV liu-liu Dirijenti sira iha neeba foti desizaun loke Fashion show iha HNGV,” hatete Deputada Bankada CNRT, Maria Gorumali Barreto liu husi plenaria PN, Segunda,(13/01/2025).
HNGV tuir Deputada nee, fatin atu halo tratamentu ba pasiente sira laos fatin neebe atu halo Fashion Show, tanba nee husu Direjente HNGV atu tetu didiak, loron seluk atu organiza atividade sira hanesan nee.
Tanba Fashion Show neebe halao iha HNGV nee ho objetivu atu halo promosaun ba farda neebe pesoal saude sira utiliza kada loron hodi halo atendimentu ba pasiente sira.
“Nee rekomendasaun ida husi Komisaun F, nunee mediku sira bele iha farda ketak no parteira sira, atu nunee familia pasiente sira neebe vizita hospital bele hatene kedas doutor no parteira mak ida neebe,” hatete Deputada nee.
(alb)
