DILI, STLTIMORLESTE.com – Partidu CNRT ho PD halao reuniaun alargada koligasaun partidu neebe partisipa husi Membru IX Governu Konstitusionál no deputadus Bankada Governu husi Parlamentu Nasionál atu konsolida ideias hamutuk kona-ba proposta Orsamentu Jeral Estadu 2025.
Tuir komunikadu neebe STL asesu Segunda nee (04/11/2024) haktuir, reuniaun ida nee lidera husi Prezidente Partidu CNRT hanesan mos Primeiru Ministru IX Governu Konstitusionál, Kay Rala Xanana Gusmão hamutuk ho Prezidente Partidu Demokrátiku ho kualidade nuudar Visi Primeiru Ministru, Mariano Assanami Sabino Lopes.
Hafoin halo diskusaun naruk no klean, Partidu CNRT no Partidu Demokrátiku konkorda ho pontu sira hanesan tuir mai, Partidu CNRT no Partidu Demokrátiku konkorda atu foku liu ba kualidade ezekusaun, laos haree deit ba taxa ezekusaun.
Partidu CNRT no Partidu Demokrátiku sei kontinua tau ba prátika slogan katak Partidu rua nee forma governu laós atu ukun maibé atu serbi, nunee sei kontinua mantein servisu diak neebe atinje ona iha 2024 no hadiak liu tan servisu balun iha 2025. Partidu CNRT no Partidu Demokrátiku sei kontinua aloka osan no implementa programa sira iha setor produtivu no setor estratéjiku sira atu nunee nafatin garante estadu nia sustentabilidade fiskal iha futuru. Partidu CNRT no Partidu Demokrátiku konkorda atu aloka osan iha kapital dezenvolvimentu ba Projetu Tasi Mane atu reativa prosesu preparasaun ba Greater Sunrise neebe iha governu liu ba lafo importánsia no atensaun.
Konsidera mós prosesu burokrasia neebé naruk iha jinastíka aprovizionamentu nian nunee impede aselerasaun de ezekusaun kategoria orsamentu iha kapital dezenvolvimentu nian. Partidu CNRT no Partidu Demokrátiku sei reforma sistema aprovizionamentu hodi aselera dezenvolvimentu ba povu.
Partidu CNRT no Partidu Demokrátiku sei kumpri kompromisu eleitoral atu hadiak erru sira neebe akontese iha Governu liu ba, tanba nee sei fo apoia masimu ba prosesu auditoria husi auditor internasional neebe lao daudaun ona.
Partidu CNRT no Partidu Demokratiku konkorda atu investe liu tán iha Rekursu Umanu setor judisiária nian atu reforma no hadiak setor refere hodi harii sosiedade neebe justu iha kurtu no longu prazu.
Ikus liu, Partidu CNRT no Partidu Demokrátiku konsidera 2025 nuudar tinan ba implementasaun kompromisu IX Governu Konstitusionál, tanba tinan 2024 konsentra liu ba esforsu sira atu hatuur hikas sistema finanseira neebe naksobu, kurrije erru sira, no halo auditória nunee asegura katak povu nia osan tenke jere ho diak.
(gui)
