DILI, STLTIMORLESTE.com – Komandante Komponente Navál, Comodoro Hígino das Neves “Super man” husu ba membru militar sira atu tane aas nafatin prestíjiu ka valor sira husi Forsas Armadas ba Libertasaun Nasional Timor Leste (FALINTIL) nian, nunee bele morin nafatin hodi hatutan sira nian mehi.
“Nafatin fiar ita boot sira katak, tinan ida nee tinan ida neebe ita hotu halo reflesaun ba ita idak-idak ninia hahalok neebe ita halo, memoria sira neebe ita halo iha tinan kotuk balu diak, mais balu mos ladun diak, ita ba halo reflesaun hodi bele hadia buat neebe ladun diak, hodi nafatin hadia ita nia aan atu kontínua tane aas ita nia prestijiu forsas armadas nian, liu-liu FALINTIL neebe ita hatutan ninia mehi, ita labele hamosu sira nia prestíjiu neebe morin, neebe povu hot-hotu hadomi nia, mundu internasional respeita sira, fiar sira, ohin loron ita harii nasaun ida nee,” hatete Comodoro Hígino das Neves “Super man” ba jornalista sira iha Naval Hera, Postu Administrativu Cristo Rei, Munisípiu Dili, Domingu (12/1/2025).
Nia husu nafatin ba Komponente Naval ninia ofisíais, Sarjentus too Prasas, hodi tane aas ida nee, hadomi sira idak-idak ninian servisu, tanba bainhira hadomi sira ninia servisu mak militár idak-idak hadomi duni sira neebe lakon ba funu, rihun atus rua ba leten soe, hadomi sira, tanba nee mak ita hadomi ita nia servisu.
“Tanba ita promete ba sira katak, ami sei halo servisu didiak, hodi hatutan ita boot sira ninia mehi, tanba nee mak ita iha nee, hau fiar katak ita boot sira sei hadomi ita boot sira nia servisu, iha loron ida nee, loron ida neebe ita hanoin katak, saida mak ita la halo diak, hadia tiha ida nee, hodi servisu hamutuk makaas liu,” nia esplika.
Comorodo mos enkoraza nia militar sira nee iha Komponente Naval atu rona malu, hatene koolabora malu, labele iha kompetisaun iha Forsas Armadas nia laran. Servisu hamutuk, ida neebe ladiak tau iha klaran, hodi diskuti, hodi hetan solusaun diak, hodi lori komponente naval ba oin, liu-liu prestíjiu forsas armadas nian.
“Hau husu nafatin ba militár sira iha Komponente Naval atu Jeneral Xefe nia lideransa, ajuda hodi bele lori forsa nee ba ida neebe nia povu hotu-hotu mehi, ida neebe FALINTIL sira mehi atu sai forsa diak, lutu diak ba nia rai, sai servídor diak ba nia povu, no ba ita nia rain,” nia informa.
Iha fatin hanesan, Xefe Estadu Maiór FALINTIL Defeza Timor Leste (F-FDTL), Tenente Jenerál Domingos Raúl “Falur Rate Laek” husu ba militár sira hotu nia serbí iha Komponente Maval, no Autoridade Marítima Nasional, funsionamentu husi mariña no autoridade marítima nasional nian iha 24 oras nia laran.
“Tanba ita boot sira neebe dedika aan tomak ba servisu insitituisaun ida nee nian, hau hatene imi nia esforsu, imi nia kompromisu ba seguransa no protesaun nasaun nian, no dezafiu finanseiru no rekursu neebe ezíje atensaun husi ita nia poder polítiku,” nia afirma.
(jen)
