DILI, STLTIMORLESTE.com – Cristiano Ronaldo sai husi Al Nassr maibe nia garante katak nia seidauk reforma husi mundu futebol.
Kontratu Ronaldo iha Al Nassr remata duni iha tinan nee. Depois jogu Al Fateh hasoru Al Nassr, Ronaldo anunsia katak nia karreira iha Al Nassr remata ona.
“Kapitulu ida nee remata ona. Istoria nafatin kontinua hakerek. Obrigadu ba ema hotu,” Ronaldo hakerek iha nia media sosial X.
Ronaldo mai iha Al Nassr iha Janeiru 2023. Desda hatais uniforme Al Nassr, Ronaldo hatudu prosesu adaptasaun neebe extraordinariu. Kapasidade Ronaldo hatama golu iha idade neebe la joven ona kontinua fo kontribuisaun boot ba susesu Al Nassr.
Prova husi nia kapasidade nee bele haree husi nia susesu hodi hetan titulu top skor. Durante temporada rua neebe kompletu iha Al Nassr, CR7 sempre remata nia jornada ho titulu top skor.
Maibe, infelizmente, susesu Ronaldo la hanesan ho susesu nia klubu Al Nassr. Ronaldo la konsege lori Al Nassr sai kampiaun Liga Saudi Arabia. CR7 mos la bele lori Al Nassr hetan kampiaun iha Liga Kampiaun Azia. Uniku titulu neebe Ronaldo hetan hamutuk ho Al Nassr mak titulu Tasa Kampiaun Arabe iha 2023.
Depois husi Al Nassr, interesante atu hein klubu tuir mai ba Ronaldo. CR7 fiar katak sei nafatin buka mantein kompetitivu, minimu too Tasa Mundial (FIFA World Cup) 2026.
Ronaldo nafatin iha ambisaun atu joga iha Tasa Mundial 2026. Se ida nee realiza, Ronaldo sei sai jogador primeiru neebe joga iha edisaun Tasa Mundial ba dala neen (6).
Klubu foun Ronaldo nian tuir predisaun klubu ida neebe sei kompete iha Kampionatu Mundial Inter-Klubu (FIFA Club World Cup). Klubu sira neebe konsideradu sai klubu foun Ronaldo nian inklui Botafogo, Palmeiras, Fluminense, no Flamengo husi Brazil, ho Wydad Casablanca husi Maroko.
(cn/trt/stl)
