DILI, STLTIMORLESTE.com – Komisaun Teknika Akompanhamentu (CTA) ba Jogos Comunidade dos Países da Língua Portuguesa (CPLP) lideradu husi Koordenador Jeral Jogu CPLP, atual Sekretariu Estadu Arte no Kultura (SEAK), Jorge Soares Cristovão, atualiza progresu preparativu ba Primeiru Ministru (PM), Kay Rala Xanana Gusmão.
Ekipa CTA molok hasoru malu ho PM Xanana Gusmão, halo ona fiskalizasaun ba infraestrutura desportivu sira hanesan Estádiu Munisipal Dili, kampu voli, tenis, basket no hotel neebe delegasaun ho ekipa atleta sira sei okupa durante estadia iha Timor Leste.
“Ida nee hanesan vizita kortezia ida husi delegasaun CTA atividade jogu CPLP hasoru malu ho Primeiru Ministru hodi informa servisu neebe loron hirak CTA halo iha Timor Leste,” Jorge Soares Cristovão hateten ba jornalista sira iha Palasiu Governu, Kinta (27/02/2025).
Iha fatin hanesan, Jorge Cesar de Carvalho sente ondradu tebes tanba bele hasoru malu ho Primeiru Ministru, Xanana Gusmão nuudar líder mundial no lider karismatiku. Ekipa agradese tebes tanba Governu liu husi Konselhu Ministru aprova realizasaun jogu nee.
“Husu media iha Timor Leste atu halo sensibilizasaun barak hodi komunidade asiste jogu neebe sei halao iha fulan Julhu tinan nee, tanba jogu nee partisipa husi nasaun membru CPLP,” nia dehan.
Ekipa CTA planeia lori delegasaun CPLP no atleta sira vizita fatin turistiku iha Dili, hodi sosa produtu Timor nian nuudar lembransa bainhira fila-fali ba sira nia nasaun.
Nunee mos Tekniku CTA, António Manuel da Luz relata progresu infraestrutura desportivu sira nee daudaun lao diak no balu sei termina iha fulan Marsu no seluk iha iha Junhu, nunee prepara ba abertura.
Jogu CPLP edisaun 12.ª neebe sei halao iha Dili, husi loron 17 to’o 25 Julhu 2025 sei halo abertura iha loron 19 Julhu.
Nasaun membru sira CPLP nian mak hanesan Ángola, Brazil, Cabo Verde, Guiné-Bissau, Guiné-Equatorial, Moçambique, Portugal, São Tomé e Príncipe no Timor Leste.
(alb)
