DILI, STLTIMORLESTE.com – Relasiona ho Komemorasaun Loron Mundial Cruz Vermelha Internasional nian, Cruz Vermelha Timor Leste (CVTL) hamutuk ho Banco de Sange realiza atividade doasaun raan hodi oferese ba pasiente sira neebe mak persiza.
Nia dehan, relasiona ho atividade ohin CVTL hamutuk ho Banco de Sange konvida Estudante husi UNPZ no estudante husi SOLS halo doasaun raan hodi ajuda maluk sira neebe mak persiza raan iha HNGV.
“Aktividade ida nee faz parte komemorasaun Loron Mundial Cruz Vermelha Internasional neebe mak monu iha loron 8 fulan ida nee, neebe atividade sira neebe ami halo nee ami servisu hamutuk ho Banco de Sange, depois ami hanesan parseiru hamutuk hodi halao atividade doasaun raan,” hatete Sekretariu Jeral CVTL, Luis Pedro Pinto ba jornalista sira iha CVTL Dili, Kuarta nee (07/05/2025).
Nia esplika, CVTL realiza atividade doasaun raan hanesan parte importante husi kampanha solidariedade no ajuda humanitária, espesialmente ba pasiente sira neebe presiza urjente raan, hanesan ema moras, inan isin rua no labarik sira, tanba doasaun ida bele salva vida.
Nia tenik, CVTL mos halo parseiru diak ho Instituisaun privadu sira, universidade, embaixada no sira seluk neebe mak durante nee fornese sira nian raan.
“Ami nia atividade aban sei haree, maibe ami planu ona oinsa atu mobiliza ami nia voluntáriu sira hodi bele halao atividade Asaun Humanitaria ninia, tanba nee atividade doasan raan nee atividade ba selebrasaun loron Mundial Cruz Vermelha Internasional nian mos,” nia informa.
Iha fatin hanesan, Arcenio Afonso husi Banco de Sange esplika, Banco de Sange parseiru diak ho CVTL neebe organiza atividade halo doasaun raan, neebe ohin konvida Estudante husi UNPZ, UNTL nomos estudante husi AHHA Education/SOLS neebe hakarak voluntáriumente atu fo sira nia raan ba pasiente sira neebe baixa iha Hospital Nasionál Guido Valadares (HNGV).
“Atu selebrasaun loron Mundial Cruz Vermelha, ita selebra ho atividade doasaun raan, tanba atividade ida nee atu hasai raan husi voluntáriu sira , tanba raan hanesan prezente neebe moris, tanba raan mo’s bele salva ema,” nia informa.
Nia deklara, funsaun husi Banco de Sange atu apoiu teknika hodi hasai raan, no raan sira nee Banco de Sange rekolha sei lori ba Banco de Sange hodi analiza teste ba raan nee, depois raan neebe la infetadu ba moras bele fo ba pasiente hodi uza.
(jen)
