DILI, STLTIMORLESTE.com – Oras nee daudaun dadur hamutuk nain 106 mak iha Prizaun Gleno, iha mos kiik oan nain 2 neebe akompanha nia mama hodi hela iha prizaun laran.
“Ami nia dadur agora nee hamutuk 106, iha prizaun kondenadu 104 no prizaun preventiva iha nain 2, husi numeru nee iha feto hamutuk nain 23 no husi nee mane hotu,” dehan Diretor Prizaun Gleno, Cristiano Salsinha ba STL liu husi telefone, Segunda (21/04/2025).
Nia hatutan, prizaun laran iha mos bebe nain rua, ida tinan ida ona, ida foin fulan ida semana rua, no ida fulan ida resin nia inan tama prizaun iha tinan 2025 nee, no ida neebe halo tinan ida ona nia inan tama prizaun iha tinan 2024.
No tratamentu ba labarik nain rua lao diak, no inan neebe partus tau iha fatin ketak, no kiik oan nain rua nia inan kondena ba iha prizaun ho tinan 4.
Maibe kona-ba difikuldade la iha ona, tanba durante nee difikuldade neebe sira enfrenta kona-ba transporte agora iha ona, no mos kona-ba numeru Guarda Prizional mos aumenta ona.
Nunee mos kona-ba tratamentu saude prizaun servisu hamutuk ho Postu Saude Railako no mos Gleno, sira halo rutina konsulta kada semana ba iha kondenadu sira neebe moras. Maibe sira neebe moras grave sei transfere ba iha Prizaun Bekora mak lori ba iha HNGV.
Iha fatin ketak, Akademiku UNTL Rafael de Jesus dehan, kria kondisaun diak ba dadur sira, maske sira hetan ona kondenasaun.
“Dala ruma ita lakohi halo krimi, maibe ho emosaun akontese problema ikus mai halo krimi, balu hetan kastigu tanba nia sala, maibe husu atu kria nafatin kondisaun diak ba sira,” dehan nia.
(ter)
