DILI, STLTIMORLESTE.com – Relasiona ho udan neebe tun makaas iha loron Domingu (22/02/2026) kalan liu ba no tuir fali mai iha loron hirak nee udan sei nafatin tun, halo dalan sira neebe atu tama bá area eskola nian nakonu ho bee, maske nunee estudante sira nafatin tama eskola hodi tuir prosesu aprendizajen iha sala laran.
Tuir observasaun STL Kuarta nee (04/03/2026) katak, iha Pre Eskolar Boa Esperansa YMCA Terra Santa, bainhira udan tun, bee sempre nalihun sai tiha ba be dalan ka mota iha estrada hodi difikulta ema no transporte bainhira atu halo movimentu. Maske nunee, estudante sira neebe eskola iha fatin oan nee, maske dalan nakonu ho be nalihun maibe sira haruka Inan aman lori hela mai hodi tama eskola.
Bainhira udan makas mai durante oras 3 to 4, udan ben laos nalihun deit iha estrada laran maibe tama mos too areador eskola nian no komunidade balun nia uma. Sekuandu udan mai makas maibe lalais ka oras 1 ka 2, entaun nalihun deit iha dalan bot bairu nian, areador eskola nian be la tama no la nalihun. Tanba nee bainhira udan ben la tama no la nalihun iha areador eskola no sala laran, atividade eskola kontinua lao hanesan baibain no estudante sira nafatin tama eskola hodi tuir prosesu aprendizajen husi profesor sira.
Bee neebe nalihun iha fatin nee lori tempu atu maran, se bainhira udan para too semana ida entaun maran hikas fali, maibe sekuandu liu loron 2 ka 3 udan mai fali, bee nee sei kontinua nalihun iha dalan nee too fali semana 1 too 2 nunee mak foin maran. Bainhira bee nee sei nalihun hela deit, komunidade no estudante neebe lao ain bele liu fali husi dalan seluk hodi tama bá area eskola no asesu bá estrada bot ka protokolu nian.
Nunee mos iha EBF 12 de Outobru Tasitolu bainhira udan, dalan atu tama ba areador eskola nian nakonu ho be nalihun, tanba nee difikulta tebes estudante sira atu lao tama mai areador eskola nian. Maske nunee estudante sira nafatin bá eskola, lao tara aan husi rede neebe igreja halo hela hodi tuir prosesu aprendizajen iha aula laran.
Bee neebe nalihun iha fatin nee lori tempu mak maran hikas fali no dalan alternativa seluk bá estudante sira atu liu laiha, entaun dalan nee dada hotu ema nia atensaun. Nunee iha loron (24/02/2026) nee ekipa husi Ministeriu Edukasaun nian lori makina supa bee hodi hasai tiha bee neebe nalihun iha fatin nee, atu nunee estudante sira bele lao bá mai eskola ho diak.
Tuir Inan husi Estudante Pre Eskolar Boa Esperansa, Maria dos Santos dehan, dalan nee kuandu bainhira udan ona, udan ben nalihun taka tomak tiha dalan nee. Entaun hakarak ka lakohi tenke liu haleu fali husi rai lolon rate nian hodi tun bá eskola, nunee mos komunidade sira tenke korta fali husi rai lolon rate nian hodi sai bá estrada bot.
Entertantu Estudante EBF 12 de Outobru Tasitolu, Joaquin da Costa dehan, dalan atu tama bá eskola nian neemak bainhira udan ona, dalan nee nakfila sai tiha be dalan mota oan tiha. Neemak difikulta tebes sira atu tama bá areador eskola nian. Maske nunee labarik sira nafatin mai eskola, sira lao tara aan deit liu husi rede moru sorin nian, tanba laiha ona dalan seluk bá sira atu liu.
Nia hatutan, bee bele nalihun maibe Sira nafatin mai eskola deit. Husi uma inan aman la hatan mai eskola, tanba dalan bee nalihun nee, maibe nudar estudante nia hakarak nafatin mai eskola.
(dom)
