DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial DCS, tanba tenta subar aikameli atu lori ba faan.
Tuir akuzasaun neebe Juiz prosesu Ivan Suritai lee sai iha loron Sesta (15/11/2024) katak, arguidu foti aikameli iha Munisipiu Lospalos tula mai iha Dili, no hakoi iha rai henek tasi ibun, too iha loron 17 fulan Janeiru tinan 2024 kee sai fali hodi tula ba iha karreta.
Iha loron 17 fulan Janeiru tinan 2024, por volta 17h00, arguidu tula aikameli kaixa rua hodi ba iha karreta Cary kor metan, neebe konduz husi ES atu lori ba hatun iha Atabae, Munisipiu Bobonaro.
Banhira too iha Mauboque, Munisipiu Likisa, Polisia halo auto stop no haree katak, sasan neebe tau iha kaixa laran aikameli, tanba nee mak halo kedan aprensaun.
Konsekuensia husi arguidu foti aikameli neebe bandu, bele halo espesie ameasadu hotu ka hamosu nia reprodusaun.
Tanba nee, Ministeriu Publiku akuza arguidu komete krime, Flora no Fauna neebe previstu iha artigu 217 husi Kodigu Penal.
Hatan ba akuzasaun neebe iha, arguidu konfesa imparsial ba faktus. Arguidu deklara katak, momentu neeba festa ida iha sira nia bairu, iha ema ruma mak husu tuir atu sosa aikameli. Tanba nee mak arguidu mos sosa tutan tan aikameli atu lori ba faan.
Arguidu deklara, momentu neeba arguidu lori duni aikameli mai iha Dili, maibe tanba tauk ema kaer lori ba hakoi hela iha tasi ibun, no tau hela tanda ida. Depois iha loron tuir mai arguidu ba kee sai tula ba karreta atu lori ba iha Bobonaro hodi faan iha Fronteira, maibe ema ruma informa no Polisia sira kaer kedan arguidu, no foti aikameli sira nee.
Arguidu deklara, razaun arguidu halo ida nee tanba momentu neeba osan la iha, no agora arguidu servisu hakiak deit animal hodi faan.
Arguidu arepende tebes nia hahalok nee, hahu husi Polisia kaer too mai agora, la halo tan aktu nee.
Rona tiha arguidu, iha alegasaun Prokurador Renato Bere Nahac husu Tribunal atu aplika pena kmaan ba arguidu, tanba konfesa ba faktus.
Enkunatu defeza Advogadu Privadu, Ismaesl Asunsao husu ba Tribunal atu aplika pena multa.
Rona tiha alegasaun Tribunal adia ba loron seluk hodi rona desizaun.
Audensia julgamentu nee, prezide husi Juiz Singular, Ivan Suritai, Ministeriu Publiku reprezenta husi Prokurador Renato Bere Nahac, arguidu hetan asistensia legal husi Advogadu Privadu Isamael Asunsao.
(ter)
