DILI, STLTIMORLESTE.com – Prezidente Republika (PR), Jose Ramos Horta entrega kadeira roda ho nesesidade baziku ba alin Eviana Octaviana Martins, ho idade tinan 9, neebe kondisaun defisiensia fíziku.
Prezidente Republika Jose Ramos Horta fahe nesesidade baziku nomos kadeira roda ba sidadaun Eviana Octaviana Martins, ho idade tinan 9, iha Aldeia 30 Agostu, Suku Komoro, parte husi programa prezidensial “Natal do Povo 2025” hodi fo ksolok domin ba labarik komunidade kbiit natoon sira.
Programa distribuisaun aihan no sasan nesesidade bazika no fahe kadeira roda husi programa karitativa inisiativa Prezidente Jose Ramos-Horta nian, neebe halao atu partilha ksolok natal dame nian ho komunidade kbiit natoon sira, labarik inan faluk, família ema ho nesesidade espesial, neebe presiza tebes tulun.
Apoiu nee parte husi aktu solidariedade husi prezidensia nian ba família refere, hafoin informasaun kona-ba Eviana nia kondisaun publika liu husi jornal balun iha semana kotuk liu ba.
Atividade nee halao iha Sabadu (09/11/2025).
Biban nee Prezidente Republika Jose Ramos Horta hatete, kadeira roda ekipa sosiedade sivil Prezidensia Republika sosa ona hein ba entrega deit.
“Hau lahatene se sosa tiha ona, hau ba haree lai, antes nee hau hatete kedas sosa kedas kadeira roda. Kuandu hau simu informasaun kalan hira liu ba hau haruka sira sosa kedas kadeira roda,” dehan Prezidente Republika.
Xefe Estadu hatete, hafoin informasaun nee too ba Prezidente Ramos Horta no Prezidente toma inisiativa tuun direta ba haree família nee nia kondisaun moris no foti medida atu ajuda kedas.
Eviana ho maun alin nain 4, entre sira Eviana mak ho kondisaun defisiensia fíziku desde nia moris mai, sira hotu hela ho inan/aman. Nia pai Julito Martins nuudar badaen uma (buru kasar), osan neebe nia hetan mak harii fali kios kiik ida ho medida 4×6, mesmu nee sai mos sira nia uma rasik.
Iha biban nee Inan Fernanda Fernandes konta katak, durante tempu barak Eviana latan deit nia isin iha kulsaun neebe nahe iha sementi leten no difisil ba nia atu tuur no lao, família presija kadeira roda ida atu nia bele movel.
Ho informasaun neebe iha Prezidente orienta ekipa Unidade Apoiu Sosial (SSAS), Prezidensia Republika nian hodi prepara kadeira roda ida no ajuda nesesidade bazika hanesan fos, mina, manu tolun hodi sustenta ba tempu badak tuir mai.
Iha biban nee Inan Fernanda hatudu sentidu kontenti no agradese ba Prezidente Ramos-Horta nia laran luak neebe bele fo apoiu ona kadeira roda no nesesidade baziku ba nia oan.
Nia hatete, ho kadeira roda nee nia oan bele tuur ho kadeira nee.
Jornalista: Emerenciana Pinto
Editora: Domingas Gomes
