DILI, STLTIMORLESTE.com – Diretor Ezekutivu Asosiasaun HAK, Feliciano da Costa Aroujo hatete, deklara rikusoin ba iha Tribunal laos hatudu aan riku, maibe ida nee hanesan komitmentu no responsabilidade husi lideransa sira neebe mak lidera hela Governu ka estadu ida nee.
“Husi ami nia pontu de vista mak akuntablidade ka transparansia ba iha ita nia rikusoin ida nee laos hatudu atu sukat Semak riku liu Semak iha semak laiha, maibe ami ida nee hanesan komitmentu ida no responsablidade ida ba iha lideransa sira neebe mak lidera Governu ka lidera estadu sira bele hatudu sira nia esperensia diak hanesan bom komportamentu ida ba sosiedade katak, sira nee laiha intensaun ladiak ba estadu ida nee ka laiha hanoin aat hanesan liafuan ida karik dehan, aproveita maibe atu bele hatete mos sira bele fo sira nia didikasaun ida neebe seriu sira nia vontade para oinsa kaer ukun ida nee liu husi deklarasaun riku soin sira,” dehan Feliciano ba jornalista sira, iha knaar fatin Farol, Dili, Tersa (07/10/2025).
Tanba tuir nia, deklara Rikusoin ba Tribunal ida nee hanesan bom komportamentu ida ba sosiedade katak, sira nee laiha intensaun ladiak ba estadu ida nee ka laiha hanoin aat ou aproveita, maibe fo sira nia didikasaun ida neebe mak seriu, vontade oinsa kaer ukun ida nee liu husi sira nia deklarasaun rikusoin sira.
“Ninia sentidu mak nee deklarasaun rikusoin ida nee atu bele garante iha transparansia ida la sukat ema neebe iha liu no laiha liu, maibe atu bele motiva nia katak nia rasik tenke esforsu oinsa mak buka ho benefisiu neebe mak nia hetan nee mai ho buat ida neebe mai ho nia didikasaun sira, laos mai ho por intensaun sira neebe mak bele viola fila fali ita nia estadu nia komfiansa neebe indizita nia liu husi povu,” dehan Diretor Hak nee.
Diretor HAK nee mos preokupa iha eleisaun povu hili partidu ida hodi ba kaer ukun no partidu eskolha ema potensia sira atu lidera ka jere administrativu sira hanesan ezekutivu ida nee presiza tau atensaun boot tebes ba iha nain ulun sira nee, situasaun ida nee iha nasaun seluk halo hanesan Indonezia, atu bele garante transparansia publikasaun ida neebe mak honestu justu akuntablidade ba iha sosiedade katak ema sira nee mai ho nia begraund hanesan nee ho status hanesan nee ho nia rikusoin neebe mak iha para garante katak nia rasik nunee kaer ukun karik la viola direitu sira neebe mak povu indizita ba nia.
“Ba ami mak nee dala ida tan espetativa boot mak husu atu orgaun 4 nee, para oinsa sira rasik halo deklarasaun ida neebe mak justu no lolos ba ita nia instituisaun relevante halo deklarasaun publikamente ba iha sosiedade tomak atu bele hatene, nunee sira rasik bele hatene kualidade sira nia didikasaun, maturidade hanesan lideransa nomos sira nia kontribuisaun tomak ba iha estadu RDTL nee,” katak nia.
Maibe nia dehan, karik iha lei ruma mak hatete bainhira kaer ukun tenke deklara nia rikusoin ida nee ema hotu presiza kumpre nee presiza respeita, no deklara rikusoin nee laos atu gavasola aan katak iha karreta motor uma andar no osan barak iha banku, maibe ida nee fo hanoin katak ema nee Honestu iha nia figura nuudar lideransa, Honestu hanesan Timoroan hanesan figura publiku ida iha sosiedade ninia para garante responsablidade ida masimu ba povu ida nee, katak ba ukun laos aproveita maibe ukun atu serbi no didika aan motiva mos mos sidadaun sira liu liu ba iha boa Governasaun.
Nunee mos Prezidente Tribunal Rekursu, Afonso Carmona hatete, relasiona ho Governante sira neebe lei fo dalan atu ba deklara rikusoin iha Tribunal Rekursu (TR), husi parte Tribunal nian sei verifika iha sistema, se mak seidauk deklara rikusoin bele hetan sansaun.
“Tuir lei KAK nian iha rua balu rejistu iha KAK no balu rejistu iha Tribunal Rekursu (TR) liu-liu orgaun soberanu sira, no tuir lei se mak la rejistu krimi dezovidensia, imi nia perguntas nee too agora ita seidauk iha dadus neebe indika se mak seidauk, maibe se karik iha ita sei aplika sansaun ba sira,” dehan Prezidente Tribunal Rekursu, Afonso Carmona.
Nia dehan, sei halo fali verifikasaun ida, tanba kada fulan Janeiru rejista ona no sei buka informasaun atu aplika sansaun ruma tuir lei haruka ba sira neebe la kumpri.
Jornalista: Emerenciana Pinto
Editora: Carme Ximenes
