DILI, STLTIMORLESTE.com – Governu ho povu Timor Leste hatoo sinseras kondolonsias ho profunda tristeza, tanba terremotu devastador neebe kona Mianmar ho Tailandia iha 28 Marsu 2025.
Liu husi Komunikadu neebe STL asesu husi Media Gabinete Primeiru Ministru (PM), Sabadu nee (29/03/205) katak, eventu trajiku ida nee halakon ema barak nia vida, estraga uma ho infraestruturas no husik komunidade sira iha susar no terus boot laran. Povu TL sente laran taridu no triste tebes-tebes ho eskala dezastre ida boot hanesan nee ho ninia impaktu, hodi nunee solidariza ho povu Mianmar no Tailandia durante momentu lutu nee.
Governu TL elojia asaun hirak neebe autoridade sira husi nasaun rua halo ona hasoru dezastre boot nee, hodi fo apoiu urjente ba sira neebe presiza liu.
“Ami mos hahí resposta neebe lalais tebes husi komunidade internasional no husu atu fo asistensia umanitaria neebe kontinua no koordenada ba povu Mianmar ho Tailandia,” hateten PM, Kay Rala Xanana Gusmão liu husi komunikadu nee.
Iha komunikadu nee dehan, hasoru trajedia sira hanesan nee, unidade ho responsabilidade neebe hotu-hotu hatudu husi komunidade internasional mak importantes liu hotu.
“Ita tenke hamutuk hodi fo asisténsia, tulun sira neebe iha krize laran no tulun hadia hikas sira nia moris ho komunidade tomak,” haktuir PM Xanana.
Nuudar mensajen-de-kondolonsias, PM Timor Leste, Kay Rala Xanana Gusmão deklara, povu Timor oras nee sente laran triste tebes-tebes tanba trajédia neebe halakon ema barak nia vida no estraga buat barak iha ami nia nasaun vizinhu sira.
“Ho laran tomak ami hatoo ami nia sentimentu solidariedade no ami hotu prontu atu fo tulun ba ami nia belun diak sira iha mementu ida difísil nee,” hatutan PM Xanana.
TL hatoo hanoin ho harohan ba família sira neebe lakon sira nia maluk doben sira, ba sira neebe kanek no sira hotu-hotu neebe terus tanba dezastre nee. Governu Timor Leste prontu atu oferese kualker asistensia neebe bele tulun esforsus ba rekuperasaun no rekonstrusaun.
(jos)
