DILI, STLTIMORLESTE.com – Jurista Sergio dias Quintas konsideira deklarasaun neebe Prokurador Jeral Republika (PJR), Nelson de Carvalho hatete kona-ba sei loke prosesu hasoru PNTL, PSIK no KAK neebe divulga sai faktus hanesan alerta ida, atu Instituisaun sira rai segredu justisa.
“Ho deklarasaun PJR nian nee, sai alerta ida ba Instituisaun sira hodi kuidadu para rai segredu justisa para labele divulga, “dehan Jurista Sergio ba STL, iha Kaikoli, Dili, Segunda (22/12/2025).
Nia hatutan, saida maka Prokurador Jeral Republika (PJR) hateten, loke prosesu hasoru PNTL, PSIK Ka KAK nee hatudu sinal diak ida ba Instituisaun estadu, liu liu Instituisaun neebe kaer investigasaun kriminal em termos investigasaun tutela ba Ministeriu Publiku.
Tanba PJR nia deklarasaun pertinente tebes hodi alerta ba Instituisaun sira nee, hodi asegura segredu iha justisa, neebe previstu iha artigu 74 husi Kodigu Prosesu Penal, durante nee nota katak, Instituisaun sira nee la konsege halo distinsaun ida neebe segredu justisa no ida neebe maka laos segredu justisa.
Iha fatin ketak, Akademiku UNTL, Sebastiao dos Santos dehan, deklarasaun Prokurador Jeral Republika (PJR) hanesan parte ida, atu investigador sira tenke rai didiak saida maka segredu justisa.
“Deklarasaun sira hanesan nee atu fo hanoin ba parte investigador sira, bainhira detein ema ruma, tenke konsidera mos saida maka segredu justisa,” dehan nia.
Nia hatutan, servisu neebe halao tenke separa buat rua, saida maka bele fo sai ba iha publiku, no saida maka labele fo sai ba iha publiku, atu asegura segredu neebe iha, hodi publiku labele hatene klean.
Antes nee, Prokurador Jeral Republika, Nelson de Carvalho deklata, sei loke prosesu hasoru parte sira neebe viola segredu justisa.
“Iha ida nee hau bele hateten kedan, Polisia sira labele halo intervensaun koalia faktus hanesan nee, hau la hatene ba oin nein Polisia nein PSIK nein KAK halo azneiras hau loke prosesu hasoru sira, hau hateten kedan ba ita boot sira regra prosesual laos hanesan nee,” dehan Prokurador Jeral, Nelson.
Nia hatutan, labele halo tuir Indonezia nian halo ida nee depois ba koalia iha neeba, Timor nia sistema la hanesan ho sira, tanba nee tenke asegura faktus sira nee, hare Polisia sira koalia sai faktus ida nee lalos, segredu justisa.
Nia dehan, ba oin sei loke prosesu hasoru sira, nein Polisia, KAK, PSIK, tanba uluk Adjuntu no Adjunta esplika no fo ona advertensia ba sira, sei mantein nafatin PJR rasik maka sei loke prosesu hasoru sira.
Jornalista: Terezinha De Deus
Editora: Carme Ximenes
