DILI, STLTIMORLESTE.com – Ministru Justisa (MJ), Sergio Hornai hatete, hanesan politiku nia orientasaun mak atu orienta ba iha servisu tekniku sira, oinsa bele halibur sira nia hanoin kona-ba dekretu Lei dominiu publiku estadu no dominiu privadu, neebe iha ona faze final.
“Ohin hau hakarak hateten lei dominiu publiku Estadu, dominiu privadu Estadu liu liu dekretu lei nee, hau bele hateten katak iha ona faze final,” dehan MJ, Sergio Hornai ba Jornalista sir,a iha Kaikoli, Dili, Kuarta (03/09/2025).
Nia dehan, parser Lei nee mai husi entidade sira hanesan Ministeriu Investimentu Estratejiku, Ministeriu Estatal no Kamara Komersiu Industria Timor Leste. Lei nee sei diskuti ho sosiedade sivil, ba sira neebe durante nee halo hela advokasia ba rai no sei haree sira nee hotu atu ho hanoin ida deit kona -ba rejime juridiku ida ba iha dominiu privadu estadu no mos dominiu publiku Estadu.
Nia hatutan, lei nee iha ona 100 porsentu atu kompleta, iha ona instrumentu legal balu, oinsa atu halo rekonhesimentu kona-ba direitu tradisional, direitu kona-ba borlakeadu, direitu kona-ba iha lisan balu rekonhese feto maka iha direitu mane la iha direitu.
Iha fatin ketak, Komunidade Suku Komoro, Domingos Mendonsa dehan, presiza duni iha lei hodi regula dominiu sira nee.
“Hanoin koalia deit la to ida, maibe presiza duni iha lei balu atu regula konaba dominiu sira nee, tempu to ona atu hadia,” dehan nia.
Aleinde nee, Jurista Jose Maria Guterres dehan, presiza duni iha dekretu lei ida hodi regulariza kona ba dominiu sira neebe iha.
“Presiza duni iha dekretu lei ida hodi regulariza kona-ba dominiu sira neebe iha, se la iha dekretu ida hanoin labele halo buat ida,” dehan nia.
Jornalista: Terezinha de Deus
Editora:Carme Ximenes
