DILI, STLTIMORLESTE.com – Delegasaun husi Estadus Unidus Amerika, Major Jeneral Andrew J. Chevalier, neebe mak mai reprezenta Adjuntu Jeral Guarda Nasional Rhode Island nian hasoru malu ho Ministru Defeza, koalia kona-ba programa dezenvolvimentu nian iha area segurasa no defeza.
Nia hatete, iha Ministeriu Defeza, delegasaun husi Estadus Unidus Amerika, Major Jeneral Andrew J.Chevalier, neebe mak mai reprezenta Adjuntu Jeral Guarda Nasional Rhode Island nian mai Ministeriu Defeza, maibe viajen ida nee hanesan viajen amizade atu identifika fila-fali relasaun amizade neebe mak Timor Leste iha ona ho Estadus Unidus Amerika.
“Liu-liu iha programa neebe mak ita dezenvolve tiha ona ho Estadus Unidus Amerika, hanesan ita boot sira hatene katak, ita TL nia independensia hetan apoiu makaas husi kongresu Amerikanu neebe loke lima, loke odamatan dehan sim senhor, TL iha nia direitu atu ukun aan, ida nee mak pozisaun Estadus Unidus Amerika foti no husi nee kedas mak relasaun bilateral, dipolmatika entre Estadus Unidus Amerika ho TL dezenvolve,” hatete Ministru Defeza Kontra Alimirante, Donaciano do Rosario da Costa Gomes “Pedro Klamar Fuik” ba jornalista sira iha Ministeriu Defeza Fatuhada, Dili, Tersa (31/03/2026).
Nia esplika, dezenvolvimentu iha kooperasaun ambitu militar defeza intensifika husi atividade barak-barak.
“Atividade neebe Estadus Unidus Amerika halo iha ita nia rain husi formasaun, atividade injenaria, ezersizu ho kontrusaun ho sira seluk neebe sira halo. Tanba nee Major Jeneral Andrew J..Chevalier mai atu bele haree fila-fali programa bolu SPP neebe mak dezenvolvidu ona entre Timor Leste ho sira, nunee mos ho programa sira seluk iha ambitu militar ba militar, iha mos atividade entre governu ba governu nunee mos sosiedade ba sosiedade,” nia informa.
Iha fatin hanesan, Major Jeneral Andrew J. Chevalier husi Guarda Nasional Rhode Island Estadus Unidus Amerika deklara, vizita mai Ministeriu Defeza hodi hasoru malu ho Ministru Defeza atu haree liu ba hasae kooperasaun segurasan bilateral.
“Parseiru ita nian nee hahu kedas antes independensia no ami valoriza ita nia parseiru ida nee, ami haree ba oin oinsa atu hametin liu tan ita nia parseiru nee ba oin no ba futuru,” nia informa.
Nia koalia, horiseik sira mos halao enkontru ho PR Jose Ramos Horta nomos PM Kay Rala Xanana Gusmão, no ohin mai enkontru ho Ministru Defeza Kontra Alimirante, Donaciano do Rosario da Costa Gomes “Pedro Klamar Fuik”. “Ami nia hakarak nee parseria entre TL Rhode Island laos deit iha area defeza, maibe iha mos area dezastre nian, tanba nee parseria nian nee ba povu TL,” nia afrima.
(jen)
