DILI, STLTIMORLESTE.com – Delegasaun husi Estadu Unidus Amerika, Majór Jenerál Andrew J. Chevalier hasoru malu ho Xefe Estadu Maior Jeneral FALINTIL – Forsa Defeza Timor Leste (F-FDTL), Tenente Jeneral Domingos Raul “Falur Rate Laek” aprezenta asuntu kona-ba apoiu ba exercício liu-liu ba dezastre naturais no umanitariu iha ambitu Forsa Armadas nian.
Nia dehan, ohin diskusaun oituan ho Majór Jenerál Andrew J Chevalier husi Guarda Nasional Rhode Island Estadus Unidus Amérika kona-ba programa neebe mak iha tinan 2023 asina ona ho asesor Jenerál USA.
Iha diskusaun nee koalia mos kona-ba kursus formasaun no kapasitasaun ba lian inglês iha sira nia rai, no koalia mos kona-ba exercício konjunta, komuniado multilateral bilateral neebe halo iha pais ida nee.
“Sira mos apoiu investimentu parte logistika nian kona-ba doasaun neebe sira fo, kona-ba istalasaun apoiu ita nia forsa AERO iha ita nia komponente direze iha Baucau no meus sesta neebe sira fo no nia manutensaun,” hatete Xefe Estadu Maior Jeneral FALINTIL -Forsa Defeza Timor Leste (F-FDTL), Tenente Jeneral Domingos Raul “Falur Rate Laek” ba jornalista sira hafoin hasoru malu ho Estadu Unidus Amerika, Majór Jenerál Andrew J. Chevalier iha Kuartel Jeneral Fatuhada, Tersa (31/03/2026).
“Ohin koalia mos rezultadu diskusaun ho ita nia ministru kona-ba dokumentu referensia neebe ita nia Governu fo sai para uniformiza ho regula, purtantu kooperasaun bilateral hotu-hotu ho paises neebe sira halo. Sira mantein servisu hanesan fo kapasitasaun ba ita nia Naval, Terestre no ba ita nia rekursu umanus, aumezmu tempu sira muda investe”, nia informa.
Nia esplika, sira apoiu ba exercício neebe sira mai atu halo liu-liu ba dezastre naturais no apoiu umanitariu iha ambitu Smik, Smik neebe mundu tomak fo prioridade.
“Sira nia apoiu nee ita prioridade rekursu umanus tanba dezenvolvimentu teknolojiku no mudansa siensia militares sira kuaze mudansa iha tempu 24 oras, entaun ita prepara ita nia rekursu umanus”, nia konklui.
Iha fatin hanesan, Majór Jenerál Andrew J Chevalier husi Guarda Nasional Rhode Island Estadus Unidus Amérika deklara, durante ninia vizita, Major Jenerál Chevalier hasoru malu ho Prezidente Ramos Horta, Primeiru Ministru Xanana Gusmão, Ministru Defeza. Xefe Estadu Maior Jenerál F-FDTL, no Sekretáriu Estadu Protesaun Sivil hodi koalia kona-ba hametin kooperasaun seguransa bilateral, hasa’e kapasidade resposta ba dezastre no asisténsia umanitária, no habelar oportunidade dezenvolvimentu edukasionál no profisionál.
“Konversa hirak-nee haree liu ba hadia koordenasaun no resposta entre ajénsia seguransa no emerjénsia Timor-Leste nian, avansa programa formasaun no interkambiu hamutuk, no promove estabilidade no reziliensia rejionál iha Indo-Pasifiku,” nia hatutan.
Majór Jeneral Chevalier mos hamutuk ho ofisiál governu sira iha serimónia lansamentu ba instalasaun Timor Leste nia Rede Komunikasaun Rádiu Emerjensia Nasional dahuluk, marku istóriku ida neebe sei hametin komunikasaun no koordenasaun entre Polisia Nasionál Timor Leste, Ajensia Protesaun Sivil, F-FDTL, no servisu ambulánsia nian.
Vizit Majór Jenerál Andrew J Chevalier nian nee reforsa parseria kleur ona entre Estadus Unidus Amérika no Timor-Leste, hodi hatudu kompromisu hamutuk ba seguransa, reziliensia, no prosperidade iha rejiaun Indo-Pasifiku.
(jen)
