DILI, STLTIMORLESTE.com – Boxista Timoroan husi El Bruto Boxing Club ho naran istimadu, Delio Anazaqeci Mauzinho hamorin naran Timor Leste (TL), susesu iha jogu Boxe Holywings Sport Show (HSS) Bali, Delio manan KO hasoru Alisher Ismailov, tuku monu iha ronde 2.
Duelu Delio versus Alisher nee sai hanesan main event ka primeiru eventu iha Kompetisaun Boxing Holywings Sport Night neebe realiza iha Atlas Super Club Bali, Indonezia, Domingu kalan (09/02/2025).
Delio neebe reprezenta sikun mean (red corner) hetan aprezentasaun ikus husi MC, hafoin aprezenta primeiru Alisher husi sikun azul (Blue Corner).
Delio iha ninia deskursu hafoin sai vensedor iha jogu Boxe HSS Bali liu husi live youtube hatoo obrigadu wain no agradese tebes-tebes.
“Hau nia prezente furak fo ba hau nia rai doben Timor Leste (TL), espesial ba hau Treinador Prinsipal El Bruto Boxing Club, Abilio Orlando dos Santos nomos Apoli, hau nia prezente mak ida nee, hau husu obrigadu barak ba imi hotu, hau determina buat neebe mak hau hakarak. Hau husu Obrigadu barak ba Primeiru Ministru Timor Leste, Avo Kay Rala Xanana Gusmão ho Timoroan sira hotu nia apoiu, hakoak boot no hadomi imi hotu,” dehan Delio neebe STL akompanha liu husi Live Youtube.
Iha biban nee, agradese mos Raul Lemos ho Diretor Ezekutivu AERO Dili, Lorenco de Oliveira neebe mak akompanha diretamente eventu Boxing nee iha Bali, liu husi fo sira nia apresiasaun kaer liman iha palku leten. Jogu Boxing tuir mai nee mak Delio sei hasoru bakh Saroha iha fulan Julhu tinan 2025, seidauk iha data fiksu maibe Saroha nia treinador promete atu realiza.
(STL)
