DILI, STLTIMORLESTE.com – Manifestasaun neebe halao husi Estudante Universidade Timor Leste (EUTL) iha Segunda nee hafutar Parlamentu Nasional (PN) oin no Universidade Timor Lorosae (UNTL) nee laos deit marka ho diskursu sira. Maibe iha Baner ka spanduk lubuk ida ho hakerek uniku neebe anima asaun estudante sira nian. Spanduk ida neebe dada ema hotu nia atensaun maka “PN RIP 65.”
Fraze ida nee hanesan Kritika ida ba Parlamentu Nasional neebe hakarak sosa Karreta foun ba Deputadu sira iha lejislatura da-6.
Aleinde ida nee, haree mos spanduk oioin iha manifestasaun sira nia let balu hakerek ho lia fuan, Anti Partidu Liberal Abaixo FRETILIN, CNRT, PD, PLP, KHUNTO no seluk tan neebe aumenta kor ba asaun ida nee.
Tuir Observador Politiku, Manuel Soares katak, hakerek ho estilu ka ala EUTL nian iha spanduk ka baner nee hatudu estudante sira nia apontalidade hodi espresa sira nia sentimentu.
Nia dehan, estudante sira hakarak kria fraze simples sira neebe laos naruk, maibe fasil ba estudante no sosiadade hotu atu komprende. Tanba metodu ida nee mak loloos efetivu ba estudante sira atu esplika saida mak sira hakarak.
Manuela husu ba membru Parlamentu Nasional sira atu labele susestima ezijensia neebe maka hatoo husi Estudante Universidade Timor Leste (EUTL) sira.” Tanba nee problema sira hanesn nee ita husu ba membru Parlamentu Nasional sira atu tau iha konsideirasaun,” dehan Manuel ba STL, liu husi messenger, Segunda (15/09/2025).
Entretantu Estudante Universitariu Timor Orientál, Marndo Maubere hatete, nia tuir manifestasaun nee atu hatoo nia hanoin no aspirasaun hodi husu ba Parlamentu Nasional, atu hapara sosa karreta no aloka osan neebe atu hola karreta nee ba fali parte seluk.
Reportajen: Carme Ximenes
Editora: Carme Ximenes
