DILI, STLTIMORLESTE.com – Departamentu haat husi Eskola Tekniku Vokasional (Tekvo) 28 de Novembru Bekora sei menus profesores no presiza aumenta tan.
Diretor Eskola Tekniku Vokasional 28 de Novembru Bekora, Tomas Pinto hatoo kestaun nee ba jornalista STL iha nia knaar fatin Bekora,Kuarta nee (07/05/2025).
“Ami nian departamentu haat nee mak hanesan, primeiru Departamentu Arte Grafika, Eletronika, Eletrisidade, Jestaun Informatika. Ami nian departamentu haat nee mak ba oin atu aumenta tan profesores, nee duni kada departamentu idak-idak ami hakarak aumenta profesores,” tenik nia.
Tomas dehan, husi departamentu haat neebe ohin mensiona nee, hanesan agora daudaun Departamentu Arte Grafika profesor nain 3, eletrisidade nain 2, eletronika nain 2 no informatika nain 2, tanba nee ba departamentu haat nee profesores seidauk sufisiente.
“Ami presiza kada departamentu ida profesores nain haat too nain 7, nee duni ba oin atu aumenta nee too profesores 12 nunee, tanba kada departamentu ida ami husu profesores nain 4, se lae nain 3, nunee bele atinji ami nian metas nee, total profesores 51, maibe ativu nee 48, total estudantes hamutuk 413,” katak nia.
Nunee mos Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes hatete, ho rekrutamentu neebe sira halo sei rezolve problema eskola neebe too agora sei menus profesor, tanba rekrutamentu neebe halo bazeia ba quadro pesoal neebe tun ona ba baze identifika profesor menus nee, tanba quadro pesoal mak termina.
“Inprinsipiu ministeriu halo hela rekrutamentu ba bolsa kandidatu katak, agora iha faze ida selesaun dokumentus, haree ba dokumentus aplikantes sira nee, no posibilidade dia 8 Maiu ba leten ami sei hahu ba teste no rezultadu husi teste nee ami sei koloka sira atu bele rezolve situasaun nee, hanesan ita boot sira haree rekrumentu bolsa kandidatu nee agora lao hela, tuir planu dia 8 Maiu ba leten ami atu halo ona teste liu husi eletroniku iha Komisaun Funsaun Publika, depois ita haree se mak iha valor bele pasa ona hodi ami bele halo kolokasaun ba professor sira nee. Depois de quadro pesoal, ministeriu mos iha nia peritus rasik atu analiza katak, eskola nee menus duni ka lae,” katak nia.
(jen)
