DILI, STLTIMORLESTE.com – Visi Prezidente Komisaun G trata Assuntu Edukasaun iha Parlamentu Nasional (PN), Deputadu Gabriel Soares husu ba Governu kontrola ID falsu sira neebe tolok no trata lider sira.
“Hau mos hakarak husu ba iha Governu, favor kontrola ID falsu sira neebe mak gosta tolok, trata, nuudar Timoroan foin daudaun fo apresiasaun ba ita nia Monsenhor, maibe presiza atu kontrola ID falsu sira neebe tolok ita nia lider sira, ida nee la merese hanesan Timoroan,” dehan Deputadu Gabriel Soares iha PN, Segunda (24/02/2025).
Iha fatin hanesan, Deputada Cedelizia Faria dos Santos husi Bankada CNRT hatutan, kona-ba ID falsu nee Sekretariu Estadu Komunikasaun Sosial (SEKOMS) nia servisu tenke kontrola.
“Hau hanoin kona-ba ID falsu nee, hau nia perguntas mak nee, ita nia SEKOMS ninia servisu nee halo saida, bele kontrola mos ba buat sira hanesan nee, ita respeita liberdade imprensa maibe ho situasaun sira nee ita preokupa,” katak Deputada Cedelizia.
Deputada Cedelizia husu mos ba Governu liu-liu Ministeriu Transporte Komunikasaun bele servisu hamutuk ho Komisaun A atu bele avansa lalais ho lei saidver traing ka silver sekurity aprova tiha para ba oin bele fo oituan ba ita nia aktus, ba ema sira neebe mak uza linguajen la edukativu sira nee.
Entretantu Ministru Asuntu Parlamentar, Aderito Hugo afirma, iha opiniaun barak mosu presiza regulariza, reorganiza no rekonsidera fali, tanba prinsipiu ba defamasaun ou nao deskriminasaun nee prinsipiu kriminalizasun, desfamasaun ida nee mak tuir hela iha sosiedade too ohin loron.
“Faktus mak ema ho dezenvolvimentu avansadu iha komunikasaun sosial ninia ema aproveita sira nee hodi halo insultu ba pesoal, grupu, ho liafuan sira nee tama ba kategoria defamasaun pesoal no defamasaun grupu, aat liu tan mk uza ID falsu kritika ema ida ke nia aberta nia aan los duni nia la taka no subar aan mas o ida kritika nee ho ID falsu ho insultus ba pesoal ou individu”, katak Aderito Hugo.
Nia haktuir, ba kuadrus politikus no lider nasional sira, faktus mak nee, realidade sosiedade sira uza nao diskriminasaun, defamasaun nee ho maneira neebe ita labele tolera ona.
(EST 2)
