DILI, STLTIMORLESTE.com – Deputadu sira iha uma fukun Parlamentu Nasional labele kritika deit, katak komunidade sira mak soe lixu arbiru nunee akontese inundasaun iha Domingu kalan (22/02) iha kapital Dili, maibe presiza tun hamutuk komunidade halo limpeza.
Tuir Akademista Judite Dias Ximenes ba STL iha nia knaar fatin Kaikoli Tersa (24/02/2026) katak, deputadu sira reprezenta povu, lo-loos nee sira mak hamutuk ho povu halo limpeza uluk, nee presiza mos elabora lei barak no presiza halo rezolusaun barak. Maibe agora deputadu sira iha parlamentu husi Segunda too Sesta halo saida, diak liu tun ho povu halo limpeza.
“Tun ho povu halo limpeza, labele dun deit povu mak soe lixu arbiru, depois fatin lixu sira nee dala ruma semana ida mos kareta la mai foti, por ezemplu hanesan iha UNTL orsamentu Estadu seidauk sai atu selu Pax, Janeiru nee mak iha Fevereiru nia laran funsionariu sira rasik nain halo, entaun deputadu sira iha neeba halo saida, loron loron halo lei ka ba fiskalizasaun loron loron ka deputadu sira tun ba servisu ho povu laos deputadu fo sala fali ba povu lae,” dehan Judite.
Nia hatete, deputadu labele fo sala povu mak soe lixu arbiru, maibe deputadu sira presiza tun hamutuk ho povu halo limpeza, no reprezenta povu halo desizaun no halo lei maibe kuandu ajenda sira nee laiha tun ba baze servisu ho povu.
Hanorin povu katak tau lixu iha nia fatin nee halo nusa, povu la matenek hanesan deputadu sira koalia nee, maibe deputadu sira mos labele matenek koalia deit maibe deputadu sira mos tenke hatudu dalan mos.
Nia hatete, tuir observasaun katak komunidade soe lixu arbiru maibe la halo lei ruma atu bandu ema neebe soe lixu arbiru laos komunidade maibe ema hotu-hotu neebe laiha konsiensia soe lixu arbiru laos ba koalia deit maibe la halo asaun ruma.
Nunee mos Visi Diretor HAK, Antonino de Lima hatete, deputadu sira iha uma fukun Parlamentu Nasional presiza halo lei hodi regula ema neebe laiha konsiensia soe lixu arbiru iha kapital Dili, laos koalia deit lahalo asaun ruma.
“Oras nee daudaun Governu prepara ona fatin hodi tau lixu, maibe lixu kontinua namkari iha fatin publiku sira, tempu udan lori ba tasi hafoer tasi no bele hamosu inundasaun bainhira tempu udan, husu Governu no Parlamentu Nasional halo lei hodi regula ema neebe soe lixu arbiru,” dehan nia.
Iha biban nee mos husu ema hotu-hotu presiza iha konsiensia rasik hodi tau lixu iha fatin neebe Governu presiza ona, labele soe lixu arbiru, se soe lixu arbiru tempu udan bele hamosu inundasaun.
Deputadu sira husi Bankada Partidu CNRT iha Parlamentu Nasional konsidera inundasaun neebe akontese iha Domingu kalan (22/02) iha kapital Dili nee tanba kauza husi komunidade sira soe lixu arbiru, tan udan tun bee labele halai tuir valeta hodi hamosu inundasaun.
Deputadu Bankada partidu CNRT, Gabriel Soares levanta liu husi plenaria Parlamentu Nasional, Segunda (23/02/2026) katak, tenke tau atensaun makaas ba lixu.
“Ita tenki tau atensaun ba lisu iha ita nia rain doben Timor-Leste liuliu iha Dili laran tanba ita hare talves udan tun sae to estrada klaran tanba bee dalan intupidu hotu husi lisu,” lamenta Deputadu Gabriel Soares.
Deputadu Gabriel afirma, komunidade sira seidauk iha Konsiensia soe lisu tuir fatin neebe PAM Dili ho Governu prepara tanba udan tun bee lori lisu hanesan aqua to tasi.
“Se ita Timor oan ita tenki tau atensaun ba Asuntu sira hanesan nee, tanba ema kuandu hare Dili mos nee, bele lori ita nia naran sei moris iha ema hotu-hotu nia matan,” dehan nia.
Fatin hanesan, Deputada Bankada partidu CNRT, Maria Barreto mos dehan, inundasaun neebe akontese iha tanba komunidade sira soe lisu arbiru.
“Hau hanoin hodi kalan ita akompania udan boot neebe akontese, no inundasaun iha fatin-fatin nee tanba parte ida ita soe lisu iha mota laran, valeta laran, no estrada ninin, tanba kuandu akontese udan boot entaun lisu sira nee mak sei tama hotu ba valeta laran nunee ikus mai akontese inundasaun neebe makas,” deha nia.
Deputada Maria husu ba Prezidente Autoridade Munisipiu Dili no Ministeriu Administrasaun Estatal (MAE) atu kontrola lisu sira neebe komunidade sira soe arbiru, nunee ba oin labele afeta ba komunidade sira wainhira akontese tan udan boot.
(eme)
