DILI, STLTIMORLESTE.com – Deputadu husi Bankada Kmanek Unidade Nasional Timor Oan (KHUNTO), Luis Roberto husu ba seguransa pesoal sira atu hatene sira nia knaar wainhira halao seguransa ba membru Governu sira.
“Ba seguransa pesoal sira tenke profisional, laos tun ba imi mak iha oin fali hodi haksesuk malu ho komunidade, nee laos servisu seguransa pesoal nia, membru Governu sira mak merese atu koalia ba malu, seguransa halo papel nuudar seguransa, laos seguransa ba oin hakilar komunidade sira,” dehan Deputadu Luis Roberto iha Parlamentu Nasional liu husi plenaria, Tersa nee (08/04/2025).
Nia hatutan, sei fo hatene ba Komando PNTL nunee bele fo orientasaun ba membru sira oinsa halao servisu nuudar seguransa ba membru Governu sira iha terenu.
“Hanesan membru Komisaun B husu ba Komando fo orientasaun ba seguransa pesoal sira hodi hatene sira nia servisu, labele arbiru, husu mos ba seguransa pesoal sira atu hatene mos sira nia papel, sira tun ba atu asegura deit laos atu koalia barak iha neeba,” dehan Deputadu, Luis Roberto.
Deputadu nee esplika, membru Governu no autoridade sira mak iha direitu koalia ba malu, papel seguransa atu halo seguransa deit ba membru Governu.
“Membru Governu no autoridade sira ho komunidade sira mak merese atu koalia ba malu, seguransa halo papel nuudar seguransa, laos seguransa mak iha oin kolia hakilar ba komunidade sira, nee laos papel servisu seguransa pesoal nia, se lae ita bele dehan, ita dezvaloriza ita nia demokrasia iha Timor Leste,” dehan nia.
Entretantu parte husi tekniku Visi Ministru Asuntu Parlamentar nian sei envia preokupasaun hirak nee ba ministeriu kompotente hodi rezolve problema nee.
(EST 2)
