DILI, STLTIMORLESTE.com – Deputadu no Deputada sira iha Uma fukun Parlamentu Nasional reprezenta povu, tanba nee presiza hatudu atitude edukativu, hakarak baku malu bolu malu sae riin, laos duni malu iha Parlamentu Nasional laran.
Kestaun nee hatoo husi Diretor HAK, Feliciano da Costa Araujo ba jornalista sira iha nia knaar fatin Farol, Dili, Kuarta (26/02/2025).
Nia hatete, uma fukun Parlamentu Nasional fatin sagradu hodi diskuti kona-ba lei no asuntu importante, laos uza sai fatin boxing.
“Hatudu ita nia imajen nee diak oituan ba para ema mos bele aprende husi ita, se agora ita ba diskute intrese povu nia maibe ita rasik hatun malu defama malu, ita hakarak sae riin iha neeba diak liu agora daudaun sadik malu nee diak liu husu ba komisaun organizadora sira ita nia GMT mamuk karik tau riin sae iha neeba deit, bele fo sai katak tempu hanesan nee ami hasai kosar duke ba hatudu iha parlamentu, “ katak nia.
Diretor dehan, parlamentu devia atu diskute lei ruma lae husik hela matenek ruma ba povu nia intrese maibe ba uza uma lulik nee uza sadik malu.
“Balu kona-ba roo Haksolok ZEEMS parte sorin la simu no parte sorin dehan durante imi mak kaer ukun naruk liu imi mak gasta osan barak liu nee halo nusa, neebe hau nia deklarasaun hau repete tan dala ida tinan 5 hanesan Prezidente dehan harii partidu foun diak liu hau hatete ba komunidade sira tau bandeira mutin hotu lalika vota, duke ba vota sira ba tuur iha parlamentu ba duni malu iha laran lalika vota ba sira,” katak nia.
Atitude Deputadu neebe hatudu brutalizmu iha Parlamentu Nasional nee hatudu imajen diak ba mundu ka le, hatan ba kestaun nee Diretor nee dehan, ida nee estraga nasaun nia naran.
“Imajen diak saida mak husi buat nee, ida nee ita laiha etika no moral, klaru katak demokrasia fo dalan be nusa la bele koalia ba malu ho dame ka no labele koalia ba malu ho ulun malirin ka ida nee deit, laos hatudu fali ita nia forsa, “ katak nia.
Nia hatutan, reprezenta povu ba tuur iha Parlamentu Nasional diak liu hatudu maturidade diak ba povu, reprezenta duni povu, hatudu aan katak ema intelektual no koalia duni kona-ba povu nia moris, nunee povu nafatin fo konfiansa.
“Dala ruma ema dehan sira diskute malu iha neeba maibe sai ba liur sira diak malu hemu kafee hamutuk, neebe ba ami nee ami baruk tiha ona lalika halo tan drama iha drama korea no seluk tan, maibe labele halo drama iha Parlamentu Nasional beibeik hanesan,” katak nia.
Nunee mos akademista Lazaro Soares hatutan, deputadu no deputada sira mak reprezenta lian laek sira iha uma fukun lulik nee, tanba nee presiza diskute asuntu neebe importante laos buka asaltu malu.
“Iha parlamentu sempre mosu diskusaun tanba iha bankada opozisaun nomos bankada Governu, maibe diak liu diskute buat neebe diak ba povu no diak ba nasaun bele hatan malu maibe labele hasai liafuan mal no labele duni malu iha Parlamentu laran,” katak nia.
Nia hatete, oras nee daudaun mundu modernu bainhira hatudu hahalok nunee povu sira sei lakon konfiansa no hatun mos maturidade deputadu sira nia.
(eme)
